Sihlulwe isithathu isancinza siphikisa ukungcwatshwa kobengumengameli waseNyonini

Emaphepheni asenkantolo, isancinza sifake incwadi yomshado enesigxivizo sasesontweni...

 Ngobengumengameli webandla lamaZayoni aseNyonini Mission uThamsanqa Nkonyane.

SIHLULEKE sesilwa ngencwadi yomshado wasesontweni isancinza sobengumengameli webandla lamaZayoni aseNyonini Mission uThamsanqa Nkonyane (75), sivimba umngcwabo  okufanele uqhubeke ngoMgqibelo oSizweni, eNewcastle.

Ngokuthola kweLANGA Lempelasonto, uNkk Sizeni uMaKhuzwayo Mazibuko oyisancinza sobengumengameli webandla, ufake isicelo samaphepha aphuthumayo eNkantolo eNkulu eMgungundlovu izolo ngoLwesine, ecela kubuyekezwe isinqumo senkantolo esigunyaza inkosikazi endala kaNkonyane, uNkk Dolly uMaNgcobo Nkonyane ukuba imngcwabe kabusha.

 Ngobengumengameli webandla lamaZayoni aseNyonini Mission uThamsanqa Nkonyane noNkk Sizeni uMaKhuzwayo Mazibuko.

Ngokwemithombo yaleli phephandaba, kubikwa ukuthi emaphepheni afakwe enkantolo, bekunanyekwe incwadi yomshado wasesontweni yesancinza nobengumengameli webandla, yincwadi echaza kabanzi ngokuthi nguMaKhuzwayo umnikazi wefa nebandla laseNyonini ngokugunyazwa yincwadi yabo yomshado wesonto eyagxivizwa ngesitembu senkonzo.

Kubikwa ukuthi esicelweni sakhe uMaKhuzwayo, ubevimba ukuba uqhubeke umngcwabo okulindeleke ukuthi ube ngoMgqibelo, efuna inkantolo iqale ibhekisise kahle udaba lwabo nenkosikazi endala.

UNkz Nontobeko Nkonyane oyilungu lomndeni, ukuqinisekisile ukuthi lolu daba lubuyele enkantolo. Uthi bathole umbiko ngoLwesithathu ebusuku betshelwa ukuthi bafuneka enkantolo.

Ngakolunye uhlangothi abeMkhabela Attorneys, ngomlomo wommeli uNtokozo Mkhabela uthe njengoba ijaji lisichithile isicelo sikaMaKhuzwayo, kusho ukuthi umngcwabo uzoqhubeka ngoMgqibelo.

Kwenzeka lokhu nje, isancinza besibuyele enkantolo mhla ka-25 ngenyanga edlule, sachithwa. Umbango wesidumbu sikaNkonyane, uqale ukugqama enkonzweni yomngcwabo eyayihlelwe isancinza ngesikhathi inkantolo iwumisa (umngcwabo) njengoba inkosikazi endala yayifake isicelo sokuwuvimba ithi yiyona enelungelo lokungcwaba.

Ebhokisini kwatholakala ukuthi kasikho isidumbu kufakwe amatshe. Kuvela ukuthi isancinza sangcwaba uNkonyane isinyenyela samgqiba ebusuku emuva kukarawondi emishini yesonto, ungazi umndeni.

Inkantolo yabe isikhipha umyalelo wokuthi simbiwe isidumbu, sinikezwe inkosikazi endala.
mthobisis@ilanganews.co.za