NGUMQEQESHI weSharks, uJP Pietersen (ongowesithathu kusuka kwesobunxele), enabadlali bakhe.

ISITHOMBE NGABE: BACKPAGEPIX

SAZI M

LISELIKHULU ithemba ngokungena emaqenjini awu-8 azodlala imidlalo yomkhumulajezi ye-United Rugby Championship (URC) kumqeqeshi weHollywoodbets Sharks, esazikhotha amanxeba emuva kokukhishwa yiConnacht yase-Ireland kwiLast 16 ye-EPCR Challenge Cup, ngoLwesihlanu olwedlule.

OShaka bakhishwe nomkhaya babo, iVodacom Bulls neDHL Stormers kulo mqhudelwano.

IFidelity Lions yona ibingeyona ingxenye yawo, kwazise yahluleka wukungena kuwona.

Umqeqeshi weSharks, uJP Pietersen, uthi iqembu lakhe lisengakwazi ukuqoqa amaphuzu awu-20 emidlalweni emine elisalele, okunganyusa amathuba alo okuqeda imidlalo yamaphuzu libalwa namaqembu azodlala eyomkhumulajezi.

 Ngaphandle kokudlala eyomkhumulajezi ye-URC, ukuqeda eyamaphuzu namaqembu awu-8, kuzokwenza oShaka bangene beshushuluza emaqenjini azodlala i-Investec Champions Cup ka-2026/27.

NGABADLALI beSharks, uJordan Hendrikse (ophethe ibhola), nguBradly Davis noJaco Potgieter.

ISITHOMBE NGABE: BACKPAGEPIX

Emuva kokuguqiswa yiConnacht, uPietersen uvumile ukuthi kuningi okuzomele bakulungise njengoba bebuyela emidlalweni ye-URC ngempelasonto yomhla ka-17 no-18 ku-April.

“Sizobuyekeza umdlalo wethu neConnacht, sizihlole, besesisebenza kanzima, futhi siqinise kokuhle esikwenzile.

"Ngeshwa sinenqwaba yabadlali abalimele, engethemba ukuthi abanye bazobe sebebuyile kule midlalo emine esele,” kusho uPietersen.

 Kule midlalo - oShaka abasele ngamaphuzu awu-7 kwiBulls elele endaweni yesi-8 kwi-log -  emibili bazoyigijima ekuhambeni, emibili ibe sekhaya.

Nokho, noma bangayinqoba yomine le midlalo, futhi bathole amaphuzu ebhonasi kuyona yonke - okungenza bathole amaphuzu awu-24  - kodwa kuzofanele bathandazele ukuthi iConnacht (9), iBulls (8), mhlawumbe neMunster (7), baqhuzuke emidlalweni emibili, kwemine ebasalele.

“Likhona ithuba lokuthi sicoshe amaphuzu awu-20 kule midlalo, okungasisiza ukuqeda sibalwa namaqembu awu-8.

"Kule midlalo, sizobhekana ne-Ospreys (yaseWales) ne-Edinburgh (yaseScotland), ekuhambeni” kusho uPietersen.

Emuva kwale midlalo, iSharks izobe isibuyela eThekwini ukuyobhekana neBenetton neZebre, okungamaqembu ase-Italy.