19 | Ezemidlalo
Friday, 10 April 2026
NGUMQEQESHI weDurban City, uPitso Dladla.
ISITHOMBE NGABE: BACKPAGEPIX
Bashaywe yiSundowns basongela i-Arrows
Umqeqeshi uthi bazoxoxa nodokotela mayelana nesimo sesitobha sakhe esimqoka
Mfanafuthi Ndlovu
BAFUNA ukuvuka ngomkhaya babo abeDurban City ezovovana inkani neLamontville Golden Arrows koweBetway Premiership ngoMgqibelo ngo-15h00, eKing Zwelithini Stadium, eMlazi.
I-City iya kulo mdlalo nje, ihlulwe yiMamelodi Sundowns ngo-1-0 koweligi ngoLwesibili ebusuku eChatsworth Stadium, eThekwini.
UPitso Dladla opheka iCity, uthi kufanele bawunqobe kumnyama kubomvu umdlalo we-Arrows kwazise bazimisele ngokuqeda besendaweni ehloniphekile kwi-log.
Uthi umphumela womdlalo weDowns sebewudlulisile, sekufanele baqhubeke nempilo kwazise iseyinde indlela esazohanjwa.
NGABADLALI beCity
ISITHOMBE NGABE: BACKPAGEPIX
"Umdlalo wethu ne-Arrows umqoka ngendlela eyisimanga, kufanele siwunqobe ngoba yiwona esifuna ukuvuka ngawo njengoba sisanda kwehlulwa yiSundowns.
"Siphoxekile ngokuhlulwa yiSundowns ekhaya kwazise inhloso yethu wukuthi kungaphumi lutho ekhaya.
"Kodwa-ke sesidlulile kulokho, sesibhekene lo mdlalo womkhaya manje,'' kusho uDladla.
Uthi basazokuba nomhlangano omqoka nethimba lodokotela bekilabhu ukubheka ukuthi uMfanafuthi Mkhize oyisitobha, ukulungele yini ukudlala njengoba enokuthinteka.