NGABADLALI beDowns okulindeleke ukuba bayisize ukudlulela kowamanqamu weCaf Champions League.

ISITHOMBE NGABE: BACKPAGEPIX

Senzo Sokhela

AKAFUNI nokuyizwa eyokubizwa kwezakhe ngezimfivilithi ukukhala zemuke nomqhudelwano weCaf Champions League umqeqeshi weMamelodi Sundowns, uMiguel Cardoso.

IDowns izodudulana ne-Esperance yaseTunisia emlenzeni wokuqala weSemi final yeCaf Champions League ngeSonto ngo-21h00 kulo leliya lizwe.

Abathandi bebhola bathipha iDowns ukuthi izokhala yemuke nalo mqhudelwano.

Isizathu salokho wukuthi izingqungqulu zase-Egypt, i-Al Ahly - ezivame ukuwuthatha lo mqhudelwano - nePyramids ewunqobe nyakenye, ihlula yona iDowns kowamanqamu, kazisabonwa njengoba zikhishwe kuma-quarter final.

Kusele izingqungqulu zaseMorocco iFAR Rabat neBerkane, abazobhekana kwi-semi final yokuqala ezokuba ngoMgqibelo ngo-21h00.

NGU-ABDRAMANE Konate we-Esperance egadulisa uMohamed Gamal we-Al Ahly yase-Egypt.

ISITHOMBE NGABE: BACKPAGEPIX

UCardoso uthi akafuni nokuyizwa eyokubizwa ngezimfivilithi ngoba nakhu engasekho amakilabhu ase-Egypt.

"Ngikholwa wukuthi womane la makilabhu asele, ayizimfivilithi ngokufanayo, wonke anethuba lokuwunqoba lo mqhudelwano.

"Kayikho ikilabhu elula kulo mqhudelwano, iyashisa insimbi kwiChampions League, akudlalwa.

"Ngiyezwa nje abantu belokhu bethi siyizimfivilithi ngoba engasekho amakilabhu ase-Egypt, kodwa ngiyaphikisana nalokho, i-Esperance inzima ikakhulukazi njengoba isekhaya.

"Kuzofanele sisebenze ngokwengeziwe uma sifuna ukunqoba lo mdlalo, singayifaki emakhanda eyokubizwa ngezimfivilithi ngoba ingasiphazamisa,'' kusho uCardoso.