NGUMATO Madlala enoMbekezeli "TLB" Mbokazi emuva kokuba iPirates inqobe iMTN8 ngesizini edlule.

ISITHOMBE NGABE: BACKPAGEPIX

Mfanafuthi Ndlovu

SICHAZWA wukuba sezingeni eliphezulu komkhiqizo wePremier Soccer League (PSL) isikhulu esiphezulu sale nhlangano egubha iminyaka ewu-30 yasungulwa.

UMato Madlala oqhoqhobele lesi sikhundla esimqoka, uthi ukuba sezingeni elicokeme komkhiqizo wePSL, kufakazelwa wukuthi kawukho umdlalo okulula ukuqagula umphumela wawo ungakagijinywa.

Ulinganise nangendumezulu yomdlalo wamanqamu weMTN8, ophakathi kwe-Orlando Pirates neMamelodi Sundowns ongoMgqibelo ngo-18h00 eMoses Mabhida Stadium, eThekwini.

"Uma ngingase ngithi masiqagule umphumela walo mdlalo, indlu yonke ingama ngenxa yokuthi akekho owazi ukuthi izozala nkomoni kuwona.

"Izinga lebhola lenyuke ngendlela eyisimanga, kayisekho ikilabhu encane kunenye uma kukhulunywa ngokudlalwa kwebhola kwiBetway Premiership," esho.

NGUMQEQESHI weDowns, uMiguel Cardoso, ekhombisa inhlonipho kuMato Madlala oyisikhulu esiphezulu sePSL.

ISITHOMBE NGABE: BACKPAGEPIX

Ucacise nangokuba nesibunge kweTheku kwiPSL njengoba le nhlangano ijwayele ukugixabeza leli dolobha ngemidlalo yamanqamu.

Uthe uMasipala weTheku kawukhethi, uhlale uzifaka izicelo uma kunemidlalo yamanqamu ezogijinywa, ekubeni abanye omasipala abanezinkundla ezinkundla, babuye bachize uma kusuke kuzobhekana amakilabhu athathwa njengamancane ngokwabalandeli.

"Ngizwile ukuthi besekunezikhalo ezithi sihlale sinika iTheku imidlalo emikhulu, okungamanga aluhlaza.

"Yiqiniso ukuthi siyiPSL siyafuna ukuthi imidlalo yamanqamu izungeze kuzona zonke izifundazwe, kepha ezinye (izifundazwe) zimane ziyichizele eminye imidlalo.

"Uma siye eMbombela, akekho umuntu okhulumayo. Sanquma ukuthi imidlalo yamanqamu sizoyizungezisa, siyafuna ukusimamisa bonke omasipala," esho.

Njengoba ephele isidumo amathikithi okubuka lo mdlalo, abangenawo bayakhuthazwa ukuyowubuka mahhala kubhazabhaza kamabonakude ozobekwa eBay of Plenty, eBeach Front, eThekwini.

Kule ndawo intokozo izoqala ngo-12 emini - kuboshelwe abaculi no-Dj abehlukene - kuyoze kulamule u-12 wasebusuku.