NGUNOZINTI weNigeria uStanley Nwabali.

UNwabali uthi ngaphandle kwabadlali abaqine ukhakhayi, ngeke ufike ndawo kwi-Afcon

UVEZA okwenza bangabi nalo noluncane uvalo ngezimbangi abazobhekana nazo kwi-quarter final ye-Africa Cup of Nations (Afcon) uStanley Nwabali (29) ovimbela iqembu lesizwe laseNigeria neChippa United yakuleli edlala kwiBetway Premiership.

ISuper Eagles izobhekana ne-Algeria kusasa ngoMgqibelo ngo-18h00. Leli qembu lizibekisele indawo kwi-quarter final linenebula iMozambique ngo-4-0 ngoMsombuluko ebusuku, kwathi i-Algeria yashaya iDR Congo ngo-1-0 esikhathini esengeziwe ngoLwesibili ebusuku.

KUZOKUBE kubhekwe isipiliyoni sikakaputeni weNigeria uWilfred Ndidi nesowe-Algeria uRiyad Mahrez uma lawa maqembu esedudulana kwi-quater final ye-Afcon.

UNwabali uthi bathembe isipiliyoni sabadlali beSuper Eagles njengoba bebheke kulo mdlalo abafuna ukuwunqoba kumnyama kubomvu. Emqhudelwaneni odlule iSuper Eagles ifinyelele kowamanqamu lapho iguqiswe khona yi-Ivory Coast ebingosokhaya ngasekuqaleni kuka-2024.

BEBEZIGWAZELA ibhece oVictor Osimhen no-Ademola Lookman iNigeria ititinya iMozambique ngo-4-0.

"Into esisebenzelayo wukuthi sibophele abadlali abaningi abanesipiliyoni, abanye sebewudlale kabili lo mqhudelwano, abanye kathathu. Lo mqhudelwano ngeke uwudlale kanye bese uzitshele ukuthi usunesipiliyoni sawo, unzima.

"Nakulo mdlalo esiya kuwona kasinalo noluncane uvalo ngoba sinabadlali abanokhakhayi oluqinile, abakwaziyo ukumelana nalolu hlobo lwemidlalo," kusho uNwabali.