Isexwayiso sikaMane kwabeSenegal

Ubona iMali izokuba yingozi kwiQuarter Final

NGUKAPUTENI weSenegal, uSadio Mane.

WEXWAYISA ozakwabo ukuzibamba ziqine uma sebebhekene neqembu elithathwa njengelifinyelele ngenhlanhla kuma-quarter final e-Africa Cup of Nations (Afcon) egijinyelwa eMorocco, uSadio Mane ongukaputeni weSenegal.

ISenegal – ethishwa ukukhala yemuke nesicoco se-Afcon – izogadulisana neMali ngoLwesihlanu ngo-18h00. ISenegal ifinyelele kulesi sigaba ngemuva kokwehlula iSudan ngo-3-1. IMali yona iguqise iTunisia ngo-3-2 wamaphenathi emdlalweni obuphele zibambene ngo-1-1.

NGABADLALI beSenegal bejabulela elinye lamagoli abo kwi-Afcon, eqhubekayo eMorocco.

IMali kayikaze iwunqobe umdlalo emizuzwini ewu-90 selokhu kuqale lo mqhudelwano, okwenza ibizwe ngezwe elinenhlanhla.

ISenegal yiyona ethishwa ukuwunqoba lo mdlalo. Yingakho-ke uMane exwayisa ozakwabo ukuzibamba ziqine kulo mdlalo, bayikhohlwe eyokwethenjwa ngabalandeli bakanobhutshuzwayo.

NGABADLALI beMali bejabula ngemuva kokunqoba iTunisia ngamaphenathi kwiLast 16.

"Kakuvamisile ukuthi izimfivilithi kube yizona ezinqoba i-Afcon. Le nto yokubizwa ngezimfivilithi iyingozi, kakufanele uyifake ekhanda ngoba izokulimaza. Njengoba siya kulo mdlalo weMali nje, eyokuba yizimfivilithi kufanele siyibeke eceleni, sizitshele ukuthi siyolwa.

"Lo mdlalo ngeke ube lula, iMali inabadlali abasezingeni eliphakeme, iningi labo elidlala e-Europe. Kuzofanele sikulindele ukuthi siyobhekana nomdlalo onzima," esho.

Isiyonke imidlalo yama-quarter final e-Afcon iqhathwe kanje:-
NGOLWESIHLANU
Mali vs Senegal 18h00.
Cameroon vs Morocco 21h00.
NGOMGQIBELO
Algeria vs Nigeria 18h00.
Egypt vs Cote d'Ivoire 21h00.