NGUMNU Vusumuzi Dlamini ongosomabhizinisi, ozakhele udumo ngokunikelela uKhuzani ngo-R150 000.

Phumlani Gama

WELULEKA intsha, ikakhulukazi enephupho lokungena emkhakheni wezamabhizinisi, ukuba ikhuthalele imfundo ngoba iyithuluzi elimqoka lokuthuthukisa ulwazi umuntu asuke ezalwe nalo, uMnu Vusumuzi Dlamini ongumnikazi weSobhuza Butchery, ozakhele udumo enikelela uKhuzani Mpungose ngo-R150 000, ukuyongcebeleka nomkakhe kwi-honeymoon.

Le njinga beyikhuluma neLANGA Lempelasonto isendaweni yayo eseNseleni, eMpangeni, ngoLwesithathu.

Leli phephandaba lihambele kule ndawo emuva kokuba kusabalale izindaba zomnikelo wakhe ka-R150 000, awunikelele uKhuzani, oyisihlabani somculo kamaskandi, osanda kugcagcelwa.

UDlamini ungomunye wosomabhizinisi asebephumelele njengoba enamabhizinisi amaningi, okubalwa kuwona elamaloli athutha impahla nomoba.

Ubuye enze eminye imisebenzi ezakhiweni zenkampani kashukela, iHullets. Ungomunye wosonkontileka abasebenza ngaphansi kwenkampani yakwaTransnet, iTelkom, iRichards Bay Coal Terminal (RBCT) neSouth 32 - ayifanisa nomzali wamabhizinsi akhe.

Uzalwe wakhulela eMabhuyeni, khona eMpangeni. Waqala imfundo yamabanga aphansi khona eMabhuyeni, ngaphambi kokudlulela KwaDukuza (Stanger), okuyilapho wagcina khona kwaGrade 10 (Std 8).

NGUMNU Dlamini.

ISITHOMBE NGU: JOHN HLONGWA

Uthi emuva kokushonelwa ngabazali, washiya isikole, waqala ukubamba amatoho ngoba efuna ukunakekela abafowabo abathathu, nodadewabo.

"Kwakhona nje ukuthi nginamabhizinisi angaka, ngiqashe abantu abaningi kangaka ekubeni ngagcina kwa-Std 8, kuyisibusiso kimina. Bakhona abantu abasha abafika kimina bezocela ukuba ngibeluleke.

" Abanye ngiyabajikisa, ngithi mababuyele esikoleni ngoba imfundo yiyona ewukhiye wokuvula yonke iminyango.

"Kungenzeka udonse izinyawo emfundweni ngoba unethemba lokuthi uzogxila ebhizinisini, kanti lizogutshuzelwa yizinkinga, liwe.

"Uma ufundile, wenza nocwaningo olunzulu ngebhizinisi ofisa ukulisungula, uzokwazi ukuvela namaqhinga amasha uma lihlaselwa yizinkinga," esho.

Iningi labantu abakhulume naleli phephandaba, lichaze uDlamini njengomuntu olungile futhi onesandla esihle emphakathini.
Babonga neqhaza lakhe lokunikelela izikole ngezinto ezahlukene.

OKUNYE NGAYE:
* Uganwe nguNkk Phumelele Hlekwayo-Dlamini;
* Babusiswe ngezingane ezine, abafana abathathu nentombazane;
* Uyingxenye yomphakathi wamabhinca;
* Unebandla iChurch of Christ Word of God Ministries.