NGU-DJ Poppy osheba umsebenzi wokuklwebha amapuleti nokuba yimenenja kwaTelkom.

Lucky Cain

UJATSHULISWA wukwanda kwezindawo zobumnandi ezidlala umculo opholile, othinta umphefumulo uDJ wesifazane osezakhele udumo ngokudlala lolu hlobo lomculo, uPoppy Cele (36), odume ngelikaDj Poppy.

Le ntokazi yaseNazareth, ngasePinetown, ingomunye woDJ besifazane abadlala umculo opholile njalo ngeSonto, ikakhulukazi ezindaweni ezingoShisanyama nezokuwasha izimoto.

U-DJ Poppy ube nengxoxo neLANGA Lempelasonto ngokungena kwakhe kulo mkhakha, nokukhetha ukugxila kulolu hlobo lomculo oludlalwa kakhulu njalo ngeSonto, olubizwa nge-R&B and Soul.

Uthi ukhulele ekhaya eliwukhonzile umculo njengoba bekudlalwa ama-record alolu hlobo lomculo kubo eNazareth.

"Sikhule ekhaya kuvele kudlalwa lolu hlobo lomculo, nami ngasengiyabambeka kuwona, ngawuthanda, futhi ngazifundisa ngawo.

"Okuchaza kakhulu ngalo mculo wukuthi uthinta inhliziyo, futhi upholisa nomphefumulo," esho.

LAPHA uyibambe nozakwabo kwezokuklwebha amapuleti, uMsizi Shembe, obuye abe ngumsakazi.

Uthi ungene kulo mkhakha wokuba nguDJ ngemuva kokufundiswa nguDJ Sonke Soul.

"Wafika ekhaya ngizidlalela lo mculo, wachazeka, wabe eseqoka ukungifundisa ngokuba nguDJ," esho.

Uthi useneminyaka emibili ejabulisa abantu ezindaweni ezahlukene. Uthi uqale ukudlala endaweni ebizwa ngokuthi kukwaRaah, wadlulela ezindaweni ezahlukene, okubalwa kuzo iSkyzer Cafe, iWiseman Carwash, iMahobza Shisanyama and Carwash, i-Exit Shisanyama, iMgababa Resort nezinye.

Uthi kuyamjabulisa ukubona ziqhubeka nokwanda izindawo zobumnandi eseziwudlala lo mculo.

"Sekujwayelekile ukuthi kulezi zindawo njalo ngeSonto, ziqale ngokudlala umculo opholile, okwenza sikwazi ukujabulisa abantu ngawo.

"Okuhle wukuthi abantu bayawuthanda, futhi ezindaweni ezidlala lo mculo kalukho udlame njengoba kuya abantu abakhulile, abasuke befuna ukuyopholisa umqondo ngomculo opholile, bazidlele inyama, bezijabulela," esho.

Uthi uyafisa ukuthi angagcini ngokudlala ezindaweni eziseThekwini, kodwa akwazi ukuphumela ngaphandle kwaleli dolobha.

"Nangaphandle kwesifundazwe ngiyafisa njengoba eGauteng sekwandile ukuthi kudlalwe lo mculo ezindaweni zakhona. EGoli kabalindi ukuthi kuze kube yiSonto, kodwa izindawo eziningi sezidlala lo mculo," esho.

Lo DJ usheba lo mkhakha nokuba yi-manager kwaTelkom. Uthe akukho lapho ephazamiseka khona njengoba ezihlelela izikhathi zokudlala.

Uncome ukubambisana okuhle nabanye ozakwabo abadlala lolu hlobo lomculo, ikakhulukazi uDJ Ntombi neqembu labesifazane, iSoul Sisters.

UDJ Poppy uthe ngaphandle kokudlala kulezi zindawo ezingenhla, uyatholakala nakweminye imicimbi okubalwa kuyo ama-picnic, neyokuzalwa, yalabo asebekhulile kanjalo nakweminye yekhethelo.