Ibheyili ka-R10 000 kuDlubheke
obhekene nawokubulala

Lo mculi kamaskandi wazinikela emaphoyiseni emuva kokuzwa ukuthi ufunwa yi-NIU

Intatheli yeLANGA

UPHUME ngebheyili ejele umculi kamaskandi uBukelani "Dlubheke" Khuzwayo (osesithombeni esingenhla), wakwaNgqulu, eNquthu, ozobuyela enkantolo mhla ka-26 kuMashi.

Ngokuthola kweLANGA Lempelasonto, uDlubheke unikwe ibheyili ka-R10 000 yiNkantolo yeMantshi yaseNquthu. Usolwa ngamacala okubulala nawokuzama ukubulala.

Ubegqunywe esitokisini eThekwini kusukela ku-Okthoba, ngelezinsolo zokubulala izinsizwa ezimbili zakwaSithole, eQhudeni, eNquthu, kwathi ezinye ezimbili zasinda. Kuthiwa leli cala lenzeka eBabanango eminyakeni emibili edlule.

Ngokwesitatimende samaphoyisa, lezi zinsizwa wazihlasela zihamba ngemoto eyodwa. Elinye icala abhekene nalo, ngelezinsolo zokubulala uninalume wakhe, elivulwe eGauteng.

Lezi zigameko zokufa kwabantu kule ndawo yaseQhudeni, KwaNgqulu, ziqale ngo-2024.

Kuvela ukuthi ukungaboni ngaso linye kwabantu emphakathini wakule ndawo, kungenxa yokunukana kwabo emuva kokuba kuhlaseleke umndeni wakwaSibiya, oganiselene nabakwaSithole.

 Kulesi sigameko, kushone inkosikazi nezingane zayo ezintathu. Lesi sigameko senzeke ngaphambi kokuba kuqubuke ingxabano yemibango yemigodi yasezimayini eseyavalwa, ebizwa ngeZamazama, eGoli.

Kunezinsolo zokuthi kwabulawa owesilisa waseMsinga, owayeyisikhulu kuyona le migodi, kanti kusolwa abantu baseNquthu.

AbaseMsinga kunezinsolo zokuthi baziphindiselile, bahlasela ngesibhamu, okuyilapho kuqale khona ukungezwani kwemindeni ethile eNquthu, inukana ngokuthi kunezimpimpi ezibize izigebengu zaseMsinga.

Kulezi zigameko zokufa kwabanye abantu bakule ndawo, bakhona ababoshiwe baseMsinga.

Ukufa kwabantu kule ndawo kuthiwa bekudalwa wukungaboni ngaso linye phakathi kwemindeni, owakwaKhuzwayo, owakwaSithole, owakwaMbatha, owakwaSibiya nowakwaNxumalo.

Lo mculi wazinikela emaphoyiseni emuva kokuzwa ukuthi uphiko lwamaphoyisa lwezimo ezibucayi, iNational Intervention Unit (NIU), belumfuna uthuli.