NGUMNU Siphiwe "Sjula" Chirwa (63), umndeni wakhe othi ugcine ukubonakala emtholampilo iKwaMashu Poly Clinic.

Uthi uhlela ukuthathela uMnyango wezeMpilo izinyathelo ngokunyamalala kwelungu lawo

Nhlanhla Hudla

UHLELA ukuthathela izinyathelo uMnyango wezeMpilo KwaZulu-Natal, umndeni wakwaKhanyile, KwaMashu, kulandela ukunyamalala kwelungu lawo emtholampilo kahulumeni, iPoly Clinic, KwaMashu ngeledlule.

Ngokuthola kweLANGA Lempelasonto,  uMnu Siphiwe "Sjula" Chirwa (63), ugcine ukubonakala ngoMgqibelo womhla ka-25 April, ekulo mtholampilo, elinde ukudluliselwa esibhedlela njengoba isimo sakhe sempilo kuthiwa sasingesihle.

Kuthiwa ilungu lomndeni ayehamba nalo, laphuthuma ekhaya liyolanda izingubo zakhe zokushintsha ayezohamba nazo uma eseya esibhedlela. Kuthiwa lamshiya nazo zonke izimfanelo zakhe, okubalwa kuzo namakhadi asemtholampilo ngoba lalizoshesha ukubuya.

Kuthiwa selibuya, kalibange lisamfica uChirwa, okwathi uma libuza kubahlengikazi nakwezinye izisebenzi zesibhedlela, kwangavela ukuthi ukuphi.

Ekhuluma naleli phephandaba uNkz Nompumelelo Khanyile, ongumshana kaChirwa, uthi uninalume wayesesimweni esibucayi, engeke akwazi ukuzihambela yedwa. Uthi bamangala uma sebefika engasekho esibhedlela.

"Umalume wahamba nomfowethu, ePoly batshelwa ukuthi uzodluliselwa esibhedlela ngoba isimo sakhe sibi.

"Umfowethu wamshiya emtholampilo engumuntu obuthaka, ephuthuma ekhaya ukuyolanda izimpahla zokushintsha ngoba kuseduze, kodwa wathi uma ebuya, wayengasekho.

"Uma sibuza kubahlengikazi, bathi kabamazi ukuthi ushonephi. Sesibheke emakhazeni aseduze kasitholanga lutho. Kuyimanje sixakekile ukuthi ngabe kwenzekeni.

"Silivulile icala emaphoyiseni aKwaMashu. Okusikhathaza kakhulu wukuthi kasazi ukuthi kwenzekeni kuye njengoba ebengaphathekile kahle. Sinxusa noma ngubani onolwazi ngaye asilekelele simthole," esho.

Uthi bahlela ukuthathela uMnyango wezeMpilo esifundazweni izinyathelo njengoba kungasatholakali namafayela kaninalume kulo mtholampilo. Uthi okubaphatha kabi wukuthi ubenalo ifayela njengoba ebejwayele ukulashwa kuwo.

Uthi ikhadi elincane elibhalwa usuku umuntu angene ngalo emtholampilo, linyamalale naye uninalume njengoba lalikuye ngesikhathi enyamalala.

Okhulumela uMnyango wezeMpilo KwaZulu-Natal, uMnu Nathi Oliphant, uthi umnyango uzolulandelela lolu daba.

Uthembise ukuthi umnyango uzoxhumana neziphathimandla zesibhedlela ngalo.

Okhulumela amaphoyisa KwaZulu-Natal, uCol Paul Magwaza, ukuqinisekisile ukuvulwa kwedokodo lophenyo ngokunyamalala komuntu ePoly Clinic.