Okungajwayelekile iSharks iyodlalela eClermont

Nhlanhla Hudla

KUZOKWENZEKA okungajwayelekile ukuthi iHollywoodbets Sharks VX iyogijimela umdlalo omqoka wombhoxo elokishini labamnyama iClermont, eThekwini.

Lokhu kuzokwenzeka uma iSharks seyidudulana neToyota Cheetahs XV koweCarling Currie Cup ngoMgqibelo ngo-17h10 eSugar Ray Xulu Stadium.

Kulo mdlalo oShaka kubhekwe ukuba babuyise isithuzi sabo njengoba sebehlulwe emidlalweni emibili ebisekuhambeni kulandelana. Kowokuvula babulawe ngenduku yiLions ngo-46-5, balandela ngesimbambamba sika-64-0, abasinikwe yiBluBulls.

Ngokohlelo lwabaphathi baleli qembu, bafisa ukuba iSharks yaziwe umhlaba wonke njengoba eminye imidlalo yayo izoyidlala ngisho e-United States of America (USA). 

NGABADLALI beSharks kubonakala ebusweni ukuthi ithemba kalisekho ngesikhathi bebhudluzwa yiLions ngo-46-5 kowokuvula lo mqhudelwano.

ISITHOMBE NGABE: BACKPAGEPIX

Ngaphandle kokudlala eClermont, iSharks ehlale iyidlalela eHollywoodbets Kings Park Stadium imidlalo yayo yasekhaya, izodlala naseMgungundlovu ngenhloso yokuhambisa iqembu kubantu, okuyisifiso seMVM Holdings - engabanye babanikazi beSharks - eholwa nguMacco Massotti ongummeli ozinze e-USA.

Ukuhambisa imidlalo emalokishini kungenye yezinto edinga ukushayelwa ihlombe kwazise iningi labantu abansundu lihlala likhombisa ukuwuthakasela lo mdlalo.

Isiyonke imidlalo yeCarling Currie Cup ihlelwe kanje:
NGOLWESIHLANU
Suzuki Griquas vs DHL Western Province 15h00.
NGOMGQIBELO
Vodacom Bulls vs Airlink Pumas 15h00.
Hollywoodbets Sharks XV vs Toyota Cheetahs XV 17h10.
NGESONTO
Boland Kavaliers vs Fidelity ADT Lions 15h00.