NGU-BRANDON Petersen weChiefs (okwesobuxele) noNduduzo Sibiya we-Arrows.

ISITHOMBE NGABE: BACKPAGEPIX

Senzo Sokhela
 
UKUFANISA nephupho ukuba khona kweKaizer Chiefs emqhudelwaneni weMTN8 ukaputeni wale kilabhu, uBrandon Petersen.

IChiefs iqhathwe neLamontville Golden Arrows kwiQuarter final yeMTN8 ngeSonto ngo-18h00 eFNB Stadium, eSoweto.

Iyobhekana ne-Arrows nje,  sekunesikhathi yagcina ukuba yingxenye yalo mqhudelwano kwazise ibisivamise ukuqeda ngaphandle kwe-top 8.

Lokhu besekudale isilonda esikhulu kubathandi bayo njengoba besebephila ngokuklolodelwa yizimbangi zabo ezinkulu, i-Orlando Pirates, esiwunqobe amahlandla amane kulandelana lo mqhudelwano.

NGU-TEFU Mashamaite owayeyisitobha seChiefs.

ISITHOMBE NGABE: BACKPAGEPIX

IChiefs selokhu yagcina ukunqoba le ndebe ngesizini ka-2014/15, ihlula yona belu iPirates ngo-1-0 wegoli likaTefu Mashamaite emdlalweni wamanqamu owawuseMoses Mabhida Stadium, eThekwini.

UPetersen uthi ngathi bayaphupha njengoba bedlala kulo mqhudelwano kule sizini.

"Siwulangazelele lo mdlalo kwazise sekunesikhathi impela sagcina ukuba yingxenye yawo. Njengoba sesikhona, sifuna ukuqinisekisa ukuthi sibuya ngegiya eliphezulu.

"Sizowuhlwitha ezimbangini zethu ezinkulu, iPirates, eziyizingqwele zawo. Kakusikho ngoba ngiyithatha kalula i-Arrows, kodwa yikhona nje ukuthi siyayidinga le nkomishi," kusho uPetersen.