Iqophisana ngqo nencintisana nazo iKia entsha

IQOPHISANA ngqo nencintisana nazo i-KIA entsha, ezothatha abaningi ngomgangatho wayo, nenani ebelingalindelekile.

Lithuse abaningi inani leKIA Seltos entsha, ethulwe kwabezindaba nabemboni yezimoto, emcimbini okhethekile obuseCape Town, oqale ngoLwesibili waze waphothulwa ngoLwesithathu.

Lo mcimbi ubuhanjelwe yisikhulu esiphezulu sakwaKIA, uMnu Hoo Gon Kim, owengamele ihhovisi elibhekelele ukuhweba eMiddle East nase-Afrika, obephelezelwa yizikhulu zakwa-KIA zaseDubai.

Bekungowesithathu kulo nyaka emuva kokwethulwa kweveni leTasman neCarens eyi-7 seater. Zombili lezi zimoto kazidayisi ngendlela egculisayo.

Le KIA Seltos ebeyethulwa kuleli sonto - eyandulelwa ngeyakhishwa ngo-2024 - inyuse izinga ngokwakheka nokubukeka kwayo, kanti abaphathi bakwa-KIA bayithwele ngeqoma.

Sithole ithuba lokuyishayela i-KIA Seltos entsha, njengoba abakwa-KIA bebehlelele izimenywa ithuba lokuchitha usuku, beyiShaya Izule emigwaqweni yaseCape Town.

Yakhiwe isimanjemanje, inobunyoninco obukuthatha ukude, inobuchwepheshe obuphambili, obuhambisana nesikhathi esizayo.

Ohlelweni lomcimbi lwangoLwesibili ebusuku, isikhulu esiphezulu sakwa-KIA eNingizimu Afrika, uMnu Gary Scott, sitshele izimenywa ukuthi eminyakeni engaphezu kuka-30 sisebenza ne-KIA, i-Seltos siyithwele ngeqoma, kasingabazi ukuthi izokwenza ezibukwayo.

UMnu Stephen Crosse, osiyikhulu emnyangweni wakwa-sales and marketing kwa-KIA, uthe emkhakheni wezimoto ezingama-crossover esigabeni sama-SUV - ngaphandle nje kobunyoninco nezinga lobuchwepheshe obuphambili - le Kia izoba ngenye yezimoto ezizothandwa kakhulu yimindeni eminingi.

Izimenywa zithole ithuba lokushayela ngokushintshana lonke uhlobo lweSeltos, obeluzokwethulwa - njengoba kunezinhlobo ezahlukene; okuyi-LS, LX, GT-Line, GT-Line S ne-X-Line.

Kubonise ukuphusa komqondo ukusetshenziswa kwemigwaqo yaseCape Town, enike abashayeli ithuba lokuzwa amandla nendlela le moto eshayeleka ngayo emigwaqeni eyahlukene.

Umzila uqale phakathi nedolobha wagudla ulwandle i-Atlantic, wakhuphukela e-Chapman’s Peak, lapho sithole ithuba lokubona izintaba ezigudle imigwaqo, engamajika, saze sayothi cababa eduze ne-Cape of Good Hope.

Okuqaphelekile futhi obekungalindelekile, kube wukwethulwa kwamanani amaSeltos akhombisile ukuthi abakwa-KIA bayaluzwa uswazi lwezimoto ezintsha emakethe, kanti nabo bayazethemba.

Amanani ami kanje; i-Seltos LS isukela ku-R389 995, i-Seltos LX yona iwu-R464 995 bese kuthi i-GT Line - eka-petrol no-diesel, iwu-R514 995 no-R544 995 ngokwahlukana.