Ubukela kwiTLB oweDurban City onephupho lokudlala phesheya

NGUMFANAFUTHI Mkhize, egadulisa u-Ashley Cupido weStellenbosh FC.

ISITHOMBE NGABE: BACKPAGEPIX

Mfanafuthi Ndlovu

UNEPHUPHO lokuhamba ezinyathelweni zikaMbekezeli "TLB" Mbokazi (21), lokugijima kwiBafana Bafana nokuwelela phesheya kwezilwandle ekubeni eqhamuka emakhaya aKwaZulu-Natal umdlali weDurban City, uMfanafuthi Mkhize (27), odabuka KwaNgcolosi, enyakatho yeTheku.

I-TLB edabuka eHluhluwe, igijime isizini eyodwa nje vo esigabeni esikhulu sePremier Soccer League (PSL), iyibamba emuva kwi-Orlando Pirates - lapho ebeyigila khona izimanga - okuyifake nakwiBafana maqede kwayitholela nekhaya elisha kwiChicago Fire edlala kwiMajor League Soccer (MLS) yase-United States of America (USA).

UMkhize uthi ubukela kwiTLB. Uthi uzokwenza konke ukusiza ezakhe ukudlulela kumaSemi final eNedbank Cup ngokuguqisa iLamontville Golden Arrows kwi-quarter final ezokuba ngeSonto ngo-18h00 eKing Zwelithini Stadium, eMlazi.

"Kusivulela ithuba elihle ukugijima kwiNedbank Cup lokubonwa ngumqeqeshi weBafana, uHugo Broos. Uma ekwazile uMbokazi ukusuka kwiPirates wathola amadlelo aluhlaza phesheya kwezilwandle - esuka eKZN - yini engasehlula ukulandela ezinyathelweni zakhe?

"Ngizimisele ngokwenyusa izinga lami kakhulu ukufaka ikilabhu kwiCaf Confederation Cup ngokunqoba lo mqhudelwano," esho.

NGUMBOKAZI enozakwabo kwiChicago Fire, uMaurico Pineda, ayibamba naye emuva.

Uthi umdlalo wabo ne-Arrows uzokuba nzima ngoba ibuya esibhaxwini esithole kwiMamelodi Sundowns sika-2-1 emdlalweni weBetway Premiership obungoLwesithathu ePitoli.

"Ngiyazi ukuthi ngeke ikwamukele ukudliwa imidlalo ilandelana. Umdlalo womkhaya uhlale uhambisana nengcindezi enkulu ngoba abadlali bayazana," esho.

Unxenxe abalandeli beDurban City ukungquzuka zinkalo zonke ukuyobafaka ugqozi, baphendule iKing Zwelithini Stadium ibe luhlaza okwesibhakabhaka.

Omunye umdlali owenza kahle kwiCity, nguDarren "Popeye" Keet (36), ongunozinti.