OweDowns ukhala 'ngokucijelwa imikhonto' kwiPSL

NGU-JUNIOR Dion we-Arrows (ophethe ibhola) eqeda ukubhakuzisa inethi bebhekene neDowns.

ISITHOMBE NGABE: BACKPAGEPIX

Senzo Sokhela

UMQEQESHI weMamelodi Sundowns, uMiguel Cardoso, uthi bazolwa kuze kube sekugcineni yize bebona ukuthi imikhonto ibhekiswe ngakubona.

IDowns iguqise  iLamontville Golden Arrows ngo-2-1 koweBetway Premiership ngoLwesithathu ebusuku eLoftus Stadium, ePitoli.

Amagoli eDowns abhajiswe enethini nguTebogo Mokoena no-Iqraam Rayners, kwathi ele-Arrows kwaba yiphenathi evalelwe enethini nguJunior Dion.

IDowns iqede lo mdlalo ingasaphelele, kukhishwa ngekhadi elibomvu uJayden Adams odlala esiswini, odlalise kabi u-Ayabulela Maxwele we-Arrows.

Kulo mdlalo kube neziwombe eziningi ezishiye abathandi bebhola bebambe ongezansi ngezinqumo zikanondweba, uSiyabulela Qunta, ebezivuna i-Arrows.

IDowns iphikelwe igoli ebelicacile, kwanikwa i-Arrows iphenathi obekungeyona.

Le phenathi yiyona esuse iDowns esicongweni se-log njengoba amagoli avele avuna i-Orlando Pirates, yabuyela esicongweni.

NGUMQEQESHI weDowns, uMiguel Cardoso.

ISITHOMBE NGABE: BACKPAGEPIX

UCardoso obedinwe egane unwabu - ethukuthele ethelwa ngamanzi - emuva kwalo mdlalo, kakuzange kuvume ngisho ukuba akhulume njengoba evele washaya ngamafuphi, wathi: "Ngiyethemba ukuthi abantu bawujabulele lo mdlalo njengoba ubunjena.

"Engizokusho wukuthi sizolwa kuze kube sekugcineni, yize sibona ukuthi imikhonto ibheke ngakithi."

ISundowns yiyona evikela isicoco seligi njengoba seyisinqobe amasizini awu-8 elandelana.