YISIKOLE uMkhumbane Secondary, esiseMayville, eThekwini.

Abazali batelekela uMnyango wezeMfundo ngokumiswa
kuka-principal, osolwa ngokugada othisha ngamakhamera

Mthobisi Sithole

SEBETELEKA emahhovisi oMnyango wezeMfundo, esekethe, abazali bezingane ezifunda eMkhumbane Secondary School, eMayville, eThekwini.

Lokhu kwenzeka ngenxa yokumiswa kukathishanhloko wakulesi sikole emsebenzini, ngoLwesibili.

Umiswa nje, kungenxa yombhikisho wothisha oqhubeka kulesi sikole, kubangwa amakhamera okuthiwa afakwe nguthishanhloko emakilasini.

Othisha bafuna akhishwe ngoba bethi ngeke basebenze begadwe ngamakhamera. Lokhu kuholele ekutheni othisha abangaphezulu kuka-20, badube ukuya emsebenzini.

USihlalo wesigungu sabazali, uMnu Bongani Mokoena, uthe abazali bafuna kubuye uthishanhloko ngoba bahambisana naye.

"Abazali bayawathanda amakhamera ngoba ayasiza," kusho uMokoena.

Uthe ukufakwa kwamakhamera bekwenzelwa ukugada abafundi emakilasini, nokulwisana nobugebengu.

Uthi bekugqekezwa, kuntshontshwa impahla yesikole, kanti selokhu efakiwe, behlile ubugebengu.

"Emakilasini sifuna ukugada abantwana bangantshontshelani ama-calculator, izincwadi nezikhwama zokuphatha izinsizakufunda.

"Kuyaxaka ukuthi kungani othisha bengafuni kugadwe abantwana," kusho uMokoena.

Uthi isinqumo sokufakwa kwamakhamera sithathwe nyakenye esigungwini sabazali. Uthi amakhamera afakwe ngoJune, ngonyaka odlule, okuthe ngoSeptember, bavuka umbhejazane othisha.

"Othisha basivukele esiswini njengotshwala ngoba zonke izingxoxo ebezenziwe, ubekhona oyisithunywa sabo, esigungwini somkhandlu wabazali," esho.

Sekuphele amasonto amathathu kutelekiwe esikoleni

Inhloko yoMnyango wezeMfundo KwaZulu-Natal, uMnu Nathi Ngcobo, ibhalele isigungu sabazali, yathi mawakhishwe amakhamera esikoleni, yamisa nothishanhloko emsebenzini.

Sekuphele amasonto amathathu kutelekiwe kulesi sikole, kungafundwa.
mthobisis@ilanganews.co.za