KUSUKA kwesokudla; nguRelebohile Mofokeng, nguTeboho Mokoena nguMohau Nkota - abadlale kwiDDC - behleli no-Aubrey Modiba.

ISITHOMBE NGABE: BACKPAGEPIX

Nhlanhla Hudla

BAZISHAYA izifuba ngokukhiqizela iPremier Soccer League (PSL) neBafana Bafana abadlali abanohlonzo abaxhasi besigaba esithuthukisa abadlali benjejane yamakilabhu adlala kwiBetway Premiership.

USandile Luthuli wezokuxhumana kwaDStv, engabaxhasi beDStv Diski Challenge (DDC) ekhuza ibuya ngale mpelasonto, utshele ILANGA Lempelasonto ukuthi bayaziqhenya ngokuba nesandla ekuvumbululeni izilomo zangomuso zeBafana, njengoba leli qembu libunjwe ngabadlali abaningi abadlule kulesi sigaba.

Phakathi kwabadlali asebephenduke izinsika zeBafana, abadlule kwiDCC phambilini ebeyaziwa ngeleMDC, kukhona uTeboho Mokoena (Mamelodi Sundowns), uRelebohile Mofokeng (Orlando Pirates) noMohau Nkota (Al-Ettifaq, yaseSaudi Arabia), ukukha nje phezulu.

Abanye balaba badlali bakhona nasesikwatini seBafana esizodlala neLesotho, kanjalo neNigeria emidlalweni yokuhlungela iNdebe yoMhlaba ezokuba seFree State ngoLwesihlanu nangoLwesibili esiya kulona ngokwehlukana.

NGUWANDILE Duba weChiefs okhushulelwe esikimini esikhulu esuka eqenjini lale kilabhu eligijima kwiDDC

ISITHOMBE NGABE: BACKPAGEPIX

ULuthuli uthi sebemagange ukuba imidlalo yeDDC yangale sizini iqale kwazise ihlala ikhiqiza izithelo ezinhle ebholeni lakuleli.

Imidlalo yeDDC yangale sizini izovulwa ngedili lemidlalo emine ezogijinywa eMpumalanga Stadium, eHammarsdale. Kuzokube kungenwa mahhala kule midlalo ehlale ibukwa yizinkumbi zabalandeli.

"Sinethemba lokuthi nakulokhu sizokwenza okufanayo nesihlala sikwenza minyaka yonke, okuwukukhiqiza ukhilimu wabadlali abagcina sebeyizethenjwa ngisho nakwiBafana Bafana.

"Njengoba isizini iqala nje, amakilabhu amaningi asuke ekhombisa ukuthi aphetheni ngokwabadlali. Sinxusa abalandeli baseHammarsdale ukuba baphume ngobuningi ukuyokweseka le midlalo," esho.

Isiyonke imidlalo yeDDC imi kanje:
NGOMGQIBELO
ESeshego Stadium: Magesi Reserves Sekhukhune Reserves 10h00.
ESolomon Mahlangu: Galaxy Reserves vs Gallants Reserves vs 10h00.
EMpumalanga Stadium: Lamontville Golden Arrows Reserves vs Richards Bay FC Reserves 13h00; Orlando Pirates Reserves vs Durban City Reserves 15h00.
NGESONTO
E-Old Peter Mokaba: Polokwane City Reserves vs Chippa United Reserves 10h00.
ETuks Stadium: Mamelodi Sundowns Reserves vs Siwelele FC Reserves 10h00.
EMpumalanga Stadium: AmaZulu FC Reserves vs Stellenbosch FC Reserves 13h00; Kaizer Chiefs Reserves vs Orbit College Reserves 15h00.