Iseluleko esimqoka kubasubathi beComrades

Mzwamandla Zondi

UQWEQWE lomqeqeshi, uXolani Mabhida, owayecija uBongumusa Mthembu enqoba iComrades Marathon amahlandla amathathu ngo-2014, u-2017 no-2018, wexwayisa abasubathi abaya kulo mjaho ngokufanele bakugweme ukuze bangabi nezinkinga emzileni.

Umjaho wanonyaka uzokuba ngeSonto lomhla ka-14 kuJune, usukela eCity Hall yaseThekwini, usongwe eScottsville, eMgungundlovu. Umjaho wanonyaka ngoka-99, kanti ungenelwe ngabasubathi abacela ku-22 000.

Ibanga okuzokube kugaduliswana kulona, liwu-85 777km, lincane ngo-133m uma liqhathaniswa nelango-2024 kukhushukwa.

NGUTHULANI Mabhida ongumqeqeshi wabasubathi.

UMabhida uthi ukuze ungabi nenkinga kulo mjaho, kubalulekile ukuba uqinisekise ukuthi kawulishintshi iteki ozokube ugijima ngalo.

"Ukusebenzisa iteki elisha ngosuku lomjaho, kungakuholela ezinkingeni ezinzima. Kungenzeka ugcine ungasakwazanga ngisho ukuqeda umjaho.

"Uma uya kwiComrades, iteku ozokube ugijima ngalo kufanele kube yilelo osewuke walisebenzisa, lazwana kahle nawe.

"Okunye okubalulekile wukungaqali into entsha ngosuku lomjaho. Izinto okade uzisebenzisa ngesikhathi uziqeqesha (supplements), kuhle ukuba uqhubeke nazo ngoba ezintsha zingakuholela ezinkingeni.

"Kufanele uwuqonde kahle umzila ozokube ugijima kuwona. Zihlele ngendlela izinto ozozidinga emzileni.

"Kufanele wazi ukuthi uma sewudlula endaweni ethile, uzodingani, futhi uzoyithola kanjani.

"Hlela izinto nethimba lakho elizokusiza kusenesikhathi. Qinisekisa ukuthi umzimba uwunakekela ngendlela.

"Kufanele ukwazi ukubuyisela ngendlela ehlelekile konke okusuke kukulahlekela emzimbeni njengoba uzokube ugijima, ungaze ube nenkinga yokuphelelwa ngamandla.

"Njengoba usuke ujuluka, usawoti uyaphela emzimbeni, qinisekisa ukuthi uyawuthola ngaso sonke isikhathi ukugwema amajaqamba. Qinisekisa ukuphuza amanzi ngaso sonke isikhathi," esho.

Umjaho wanonyaka uzokube uhlukaniswe izigaba ezintathu. Abokuqala bazosuka ngo-5 ekuseni, isigaba sesibili sizoqala ngo-05h15, kuthi abokugcina baqale ngo-05h30.