I-Iran izogoba amadlangala eMexico

SELUQINISEKISIWE usuku okuzofika ngalo i-Iran emqhudelwaneni weNdebe yoMhlaba yeFifa ozokuba seMexico, eCanada nase-United States of America (USA) ngokuhlanganyela ngelizayo.

Izonikela eMexico ngeSonto, yize yonke imidlalo yayo yamaqoqo ise-USA.

Kuzokhumbuleka ukuthi i-Iran ibhekene ngeziqu zamehlo ne-USA njengoba kunempi eseyihlukumeze umhlaba wonke, ethinta ikakhulukazi womabili la mazwe. 

Nakuba zisabekwe phansi izikhali okwamanje - njengoba izingxoxo zokuthula ziqhubeka - kodwa bekunovalo leqembu lase-Iran njengoba lizodlala kulo mqhudelwano.

Abadlali balo bebenqaba ukuya kulo mqhudelwano, basaba ukwenzakaliswa. I-Iran ize yacishe yahoxa kulo mqhudelwano, kodwa yancengwa ukuba izobamba iqhaza kuwona.

Iku-group G neBelgium, yi-Egypt neNew Zealand.

Izovula neNew Zealand ngomhla ka-15 eLos Angeles, ibhekane neBelgium mhla ka-21 eLos Angeles, ivale ne-Egypt mhla ka-26 eSeattle Stadium. 

Isitatimende esithunyelwe yinhlangano ephethe ibhola kuleliya lizwe, sithi leli qembu lizonikela ngeSonto eMexico, ukuyoqala amalungiselelo alo mqhudelwano.

"Iqembu lethu lizosuka ngoMgqibelo e-Iran, lifike ngeSonto eMexico. Abadlali bethu banakho ukwesaba, kodwa sikwazile ukubeluleka ngokomqondo," kusho isitatimende.

Sithi njengamanje leli qembu lisekhempini eTurkey, okuyilapho lilungiselela khona le midlalo. Lizosukela khona seliya eMexico.