NGUSIPHO Chaine ongunozinti weBucs, ebhunga nozakwabo, uThabiso Lebitso.

ISITHOMBE NGABE: BACKPAGEPIX

Senzo Sokhela

UPHUMELA obala ngokubabeka ethubeni elingcono lokunqoba enye inkomishi kulo nyaka unozinti wokuqina we-Orlando Pirates, uSipho Chaine.

IBucs izodudulana neMarumo Gallants kowamanqamu weCarling Knockout ngoMgqibelo ngo-18h00 ePeter Mokaba Stadium, ePolokwane.

EZimnyama ziya kulo mdlalo nje, sekuqinisekisiwe ukuthi enye yezinsika zayo, uMbekezeli "TLB" Mbokazi waseHluhluwe, KwaZulu-Natal, iyahamba njengoba isayiniswe yiChicago Fire yase-United States of America.

NGU-CHAINE "ebhabhadisa" uzakwabo, uSipho Mbule osephendule isithandwa sabathandi bePirates ngeminyakazo yakhe esiswini sale kilabhu.

ISITHOMBE NGABE: BACKPAGEPIX

UChaine ephawula ngalo mqhudelwano abaqalayo ukufinyelela kowamanqamu wawo njengoba ngesizini edlule bephume ekuseni kuwona - bewashiswa ijezi yiMagesi FC egcine idla ubhedu lwawo - uthe:
"Lena ngenye yezinkomishi esizodlala owamanqamu wayo ngale sizini.

"Sizitshelile nozakwethu ukuthi kuzofanele sifuqe ukuze sengeze enye inkomishi ngale sizini. Okusibeka ethubeni lokunqoba le nkomishi wubumbano nokubambisana njengoba senza amalungiselelo.

"Ngendlela imimoya ephezulu ngayo, uyabona ukuthi sonke sikulangazelele ukunqoba le nkomishi.

"Iphutha okungafanele silenze wukucabanga ngezinto ezedlule, nokuthi le nkomishi ibilokhu isiphunyuka. Kufanele sicabange ngalo mdlalo nje kuphela ngoba yiyona into emqoka ephambi kwethu," esho.

IPirates ivele seyinenkomishi ekhabetheni layo kule sizini njengoba inqobe iMTN8 yehlula iStellenbosch FC ngo-3-0 ovuthayo kowamanqamu obuseMbombela Stadium, eMpumalanga.

IBucs ibisiyinqoba okwesine kulandelana le nkomishi esiyiphendule eyayo.