Oweshashalazi uqhakambisa imvelaphi kamaskandi

NGUMFILISENI "Mqabulasheshe" Magubane. 

Lucky Cain

UQHAKAMBISA umsuka nemvelaphi yomculo kamaskandi umdlalo weshashalazi ozokhonjiswa eBessie Head Library, eMgungundlovu, kusukela namhlanje ngomhla ka-5 kuya kumhla ka-7 kuDecember nonyaka.
   Lo mdlalo obizwa ngeMaskandi The King Musical, ubhalwe waqondiswa nguThokozani Shelembe.

Ekhuluma neLANGA Lempelsonto uShelembe, uthe konke sekumi ngomumo ngalo mdlalo ozodlala izinsuku ezintathu zilandelana.

Uthe unxusa umphakathi oqhamuka ezindaweni ezahlukene ukuba ufike uzozibonela lo mdlalo njengoba uzobe uveza iqhaza elabanjwa ngabantu abahlukene ukufukula lo mculo ube kwibalazwe
lomhlaba.

"Lapha sikhuluma ngoMxhayi Bhengu, odume ngelikaPhuz' shukela  (osesithombeni esingezansi), othathwa njengoyise kamaskandi. Sizoveza iminyaka yo-1960, okuwunyaka okwazaleka ngawo lo mculo, uzalwa nguyena uPhuz' shukela," kusho uShelembe.

UShelembe uqhube ngokuthi bakhona nabanye abazoveza amaqhaza abo kulo mculo, njengabantu abafana no-Aaron Mbambo, uMoses Mchunu, uThwalofu Khoza, uSipho Mchunu, uMzikayifani Buthelezi, oNganeziyamfisa, uKhambalomvaleliso, Amaphisi noMgqashiyo Ndlovu ukukha phezulu.

UShelembe uthi inhloso yalo mdlalo wukukhumbuza abantu ngamaqhaza alaba baculi emculweni kamaskandi.

"Kulo mdlalo sizophinde sidlale izingoma zalaba baculi njengoba sizobe sine-band ebizwa ngokuthi, 'Ophazamisa',  ezobe isidlalela lezi zingoma," esho.

UShelembe uthi phakathi kwezicukuthwane ezizoba yingxenye yalo mdlalo kukhona Amaphisi, uPhuzekhe-misi, uThwalofu, uSipho Mchunu nomndeni kaMnu Bhodloza Nzimande, naye elivelayo iqhaza lakhe ekuthuthukiseni lo mculo ngesikhathi eshayela uhlelo oluthi, Sigiya Ngengoma, emsakazweni Ukhozi FM.

Uthe amathikithi okubuka lo mdlalo azotholakala emnyango ngo-R100.