OweDowns usayishalazela eyokukhuluma ngesicoco seligi

NGU-MIGUEL Cardoso ongumqeqeshi weDowns.

ISITHOMBE NGABE: BACKPAGEPIX

Senzo Sokhela

AKAKAFUNI nokuyikhuluma eyesicoco seligi umqeqeshi weMamelodi Sundowns, uMiguel Cardoso, njengoba ethi luselude uhambo.

IDowns izobhekana neLamontville Golden Arrows koweBetway Premiership ngeSonto ngo-15h00 eKing Zwelithini Stadium, eMlazi.

Iya kulo mdlalo nje, iguqise iMilford FC ngo-2-0 koweligi ngoLwesithathu ebusuku eLoftus Stadium, ePitoli.

Amagoli eDowns ashaywe ngu-Iqraam Rayners no-Antonio van Wyk.
IDowns isanda kubhekana nayo i-Arrows kwi-semi final yeMTN8 ngeledlule eKing Zwelithini Stadium.

Kunqobe iDowns ngo-3-2 - kube wu-3-3 uma sekuhlanganiswe nomphumela womlenze wokuqala.

NGABADLALI beDowns u-Iqraam Rayners, u-Aubrey Modiba no-Antonio van Wyk.

ISITHOMBE NGABE: BACKPAGEPIX

UCardoso uthi akakafuni ukuyikhuluma eyesicoco seligi.
"Ngigculisekile ngendlela esidlale ngayo sibhekene neMilford.

"Ngikholwa wukuthi nalaba abebelingabaza ibhola leSundowns balibonile kulo mdlalo, babona ukuthi idlala kahle kanjani.

"Eyesicoco seligi kasikafuni ukuyikhuluma, sizobhekana nomdlalo ngamunye.
Njengamanje umdlalo esibheke kuwona ngoweGolden Arrows okufanele siwunqobe kumnyama kubomvu.

"Kasizimisele ngokulahla amaphuzu ngoba isimo sinzima izimbangi zethu nazo zizimisele, ziyanqoba futhi zinjalo,'' kusho uCardoso.