NGABADLALI beMagesi FC esizololongwa nguJohn Maduka.

ISITHOMBE NGABE: BACKPAGEPIX

Linda Ximba

IMAGESI FC seyithule uJohn Maduka njengomqeqeshi wayo omusha, ngaphambi kokuqala kwesizini ka-2025/26 yeBetway Premiership.

Le kilabhu yaseLimpopo isanda kwethusa abaningi ngokudedela u-Owen da Gama oyisindise ezembeni ngesizini edlule.

UMaduka ubekade eqeqesha iRoyal AM exoshwe kwiPremier Soccer League (PSL) ngenxa yezinkinga zemali, eziholele ukuthi umphathi wayo uShauwn Mkhize alandelwe ngabaqoqi bentela, iSA Revenue Services.

Kulindeleke ukuba uMaduka asebenze noJacky Ledwaba njengomsizi wakhe. Lo mqeqeshi waseMalawi, owafika eNingizimu Afrika ezodlala kuMtata Bush Bucks, unesipiliyoni sokusebenza esigabeni esiphezulu njengoba eseke walolonga iBloemfontein Celtic neMaritzburg United.

NGU-JOHN Maduka osethole ikhaya elisha kwiMagesi.

ISITHOMBE NGABE: BACKPAGEPIX

IMagesi FC isanda kukhulula inqwaba yabadlali okubalwa kubo uGift Motupa, uNtsako "Neverdie" Makhubela, uDeolin Mekoa, uRhulani Manzini, u-Amos Mokwena, uBoikanyo Komane, uMaboke Matlakala, u-Anathi Ngwadla, uGiven Mashikinya noMenzi Ndwandwe.

Ngesizini edlule imangalise abaningi igingqa izimfivilithi, iMamelodi Sundowns kowamanqamu weCarling Knockout Cup ngo-2-1 eBloemfontein.

Ngaleso sikhathi ibiphekwa nguClinton Larsen ogcine echithwa ngenxa yokugqoza kwemiphumela emihle ngokuhamba kwesikhathi.

NeSundowns ikhulule uManqoba "TV" Mngqithi obengumqeqeshi wayo emuva kokuhlulwa yiMagesi FC, yaqasha uMiguel Cardoso wasePortugal, osayibambile namanje.

Le Magesi yansondo yayivule imidlalo yeCarling Knockout ngokuwashisa ijezi i-Orlando Pirates kwi-last 16.