Izindaba | 12
Friday, 04 July 2025
NGUSBAHLE oyindodakazi kaNtando Duma- Rambani.
Izinkundla zokuxhumana sezidlisela ogageni izinkampani ezitholelana imisebenzi
Mpume Sibiya
PHAMBILINI ebantwini abampisholo bekuba wumqansa ukungena emikhakheni, okubalwa eyokukhangisa noma ukuvela nje kumabonakude.
Kuqala ubuxhumana nezinkampani ezizokutho-lela umsebenzi (casting agencies), nazo obekuba nzima ukufinyelela kuzona, okuhlanga-nisa nokuthi ziyabiza.
Ngisho usuzitholile, bekuba yimicikilisho ukuqasheka, kwazise kudlulwa kwinhlolokhono nemincintiswano ehlukene, obekuyindlela obekuhlungwa ngayo abazogcina bephumelela.
Muva nje zibukeka sezishintshile izinto, futhi sezilula ngenxa yezinkundla zokuxhumana.
Kwabazisebenzisa ngendlela efanele, sezibavu-lele inkundla yokugqamisa amakhono ngisho nokuthola amathuba emisebenzi.
NGULINDOUGH ongumculi, nendodana yakhe uValdo, abahlale bephithizela ezinkundleni zokuxhumana, futhi abahlale befaniselene.
NGUVALDO.
NGU-FLO kaSthelo Shozi.
NGUBABY Makhosini kaSthelo Shozi.
Baningi okufezeka amaphupho abo besizwa yizinkundla
Abaningi bazisebenzisa ukuveza amakhono okungaba ngawokuhaya izinkondlo, wukucula, wukudijeya, wukumodela, wukudansa, wukuphe-ka, wukubhaka, wukusika ingqephu, wukuphaqula, ezamabhizinisi njalo njalo.
UNkk Welile Mchunu obehlale ekhuluma ezinkundleni, namuhla unebhizinisi lokupheka axhaswa ngabalandeli bakhe ngokulisungula, bemnikelela ngezinto zokuliqala.
Bakhona abazisebenzisa budlabha, bagcine bezakhela izitha ngezinkulumo ezinenhlabathi, kwabanye kuphume nezidumbu, njengalaba okuthiwa bebegxibha abacula umaskandi.
AYANDA NAMA-BABY INFLUENCER
Umfanyana owaziwa ngelikaBhut Omdala kwiTiktok, (osesithombeni esingezansi), ongafunga ukuthi una-6, ngendlela abukeka ngayo, ubelokhu evezwa kuma-video ahlukene, namuhla useyacula, uvela nasezikha-ngisweni okubalwa nakwesenyama echochombalisiwe (KFC). Umenywa ukukhuluma eziteshini ezehlukene zemisakazo kuhlanganisa noKhozi FM, futhi ubuye asho nama-promo. Udunyiswe yizinkundla zokuxhumana.
Osaziwayo okubalwa kubona uNtando Duma, uDJ Zinhle, uLindough ongumculi nowaziwa ngoDaddy kaValdo ezinkundleni zokuxhumana, bangabanye babazali abavulela izingane zabo ama-social pages nama-channel azo, njengoba sezize zaduma.
NGUKAIRO Forbes, oyindodakazi kaDJ Zinhle no-AKA, okhangisa ngezimpahla zokugqoka zakwa-Ackermans
EkaNtando nguSbahle, ihlale ivezwa nezinwele ezinhle; ekaLindough nguValdo, ihlale igqoke ifaniselene noyise; ekaDJ Zinhle nguKairo kumanje ivela ezikhangisweni zakwa-Ackermans.
Eka-Anele Mdoda ngu-Alakhe, nayo ivezwa esikhangisweni seDanone Yoghurt.
EzikaDJ Sthelo Shozi nazo uzenzele amakhasi azo, enye yazo, uBaby Makhosini, inelebuli yayo yezimpahla zokugqoka.
YINGANE kaDJ Sthelo Shozi, uFlo, unina ayenzele amakhasi igqokiswe kahle.
NGU-ANELE Mdoda nendodana yakhe, u-Alakhe.
U-Ibanathi Mpungose (9) (osesithombeni esingezansi), ongumshana kaSiyabonga Mpungose oyimbongi, ukuhlakanipha kwakhe kumphendule usaziwayo kuma-social platforms. Waqala emncane ukuvezwa ezinkundleni, ekhuluma into eyome khweqe. Umenywa, akhulunyiswe nasemisakazweni, ikakhulukazi uKhozi FM, futhi uke aphathe imicimbi yezingane.
NGUMSAKAZI woKhozi FM, uDudu "Lady D" Khoza no-Ibanathi Mpungose. Kwesingezansi ngu-Ibanathi owaqala emncane ukwaziwa ezinkundleni zokuxhumana.
KUKHONA NOSAZIWAYO, ABANYE BABO ABAQOKWA NGOKUBA NENQWABA YABALANDELI
Muva nje umlingisi omnkantshubomvu, uMeshack Mavuso nabanye abakulo mkhakha, basanda kugxeka indlela izinto esezenzeka ngayo.
Bathi kubuye kuqashwe izingane ezingama-influencer, zibonakale sezilingisa noma zisakaza noma zethula izinhlelo, ekubeni zingaqeqeshiwe kuleyo mikhakha.
Ngokusho kwabo, akukuhle ukuthi lingabhekwa ithalente, kodwa kuthathwe abantu abangazi lutho ngomsebenzi ngoba nakhu benabalandeli abaningi, okuthenjelwa kubona ukuba benyuse izinga lalowo mdlalo noma umsakazo.