Bavuna izithelo zokuqhakambisa isiZulu ezinhlelweni zodado

Lucky Cain

SESIQALILE ukuvuna izithelo zokuqhakambisa ulimi lwesiZulu isiteshi sikamabonakude sakuleli iPlay Room, esigabe ngopopayi nezinye izinhlelo zezingane.

Lesi siteshi esitholakala kuDStv Channel 300, sinyelwe yinyoni esandleni ngokuqokwa emcimbini wokuklomelisa iziteshi zikamabonakude waphesheya kwezilwandle, obizwa nge-International Emmy Awards, ngaphansi komunxa weKids: Factual and Entertainment.

Ngokwezibalo zakamuva, lesi siteshi sibalwa nezinye ezihamba phambili ngezinhlelo zezingane eNingizimu Afrika, kanti singaphansi kwenkampani iThe Rooms Network, ephethe nezinye okubalwa kuzo esamafilimu iMovie Room, etholakala kuDStv Channel 113 neNewzroom Afrika, okuyisiteshi sezindaba esisakaza ubusuku nemini.

NGUMNU Thokozani Nkosi oyisikhulu senkampani iThe Rooms Network, ephethe iziteshi iPlay Room, iMovie Room neNewsroom Afrika.

ILANGA Lempelasonto libe nengxoxo nesikhulu sale nkampani, uMnu Thokozani Nkosi, ozwakalise ukujabula ngokuthi ngemuva kweminyaka emithathu iPlayroom ingenile emoyeni, aseyabonakala amagalelo ayo.

Uthe ukuthatha kwabo izinhlelo zezingane, bazenze ngolimi lwesiZulu, kube nomthelela omkhulu ukusondeza odado kulesi siteshi.

"Siyazidlala izinhlelo ezifana noCocomelon ngesiNgisi, kodwa siqaphelile ukuthi uma sesizidlala ngesiZulu, izinombolo zababukeli ziyanyuka, okuyinto esiyibone isisebenzela kakhulu," kusho uNkosi.

Uthe ngesikhathi bethatha isinqumo sokufaka isiZulu, inhloso kwakuwukulwa nenkinga yokushabalala kwezilimi zakuleli.

"Uma ubheka isikhathi samanje, izilimi zakuleli ziyashabalala, sekuchuma isiNgisi sengathi yisona sodwa esikhona. Kumele sibaqale besebencane abantwana ukuqonda izilimi zabo, ukuze bakwazi ukuzigqaja ngazo."

Uthi basezinhlelweni zokwezengeza ezinye izilimi ezikhona kuleli.

"Sikhethe ukuqala ngesiZulu ngoba yisona esikhulunywa kakhulu ngaphandle kwesiNgisi kuleli."

Ukukhulisa izilimi zesiNguni, uNkosi uveze ukuthi bakuqale ngeNewzroom Afrika, ezinhlelweni zabo zezindaba. Uveze nokuthi nasesiteshini samafilimu iMovie Room, bayawathatha amafilimu akhiqizwe phesheya, bawakhulumise isiZulu.

"Sisanda kwethula ifilimu iJumanji, okuyifilimu eyaziwayo, kodwa abantu bayayithokozela njengoba siyidlala ngesiZulu. Sinawo namanye esisezinhlelweni zokuthi siwadlale okubalwa neWhite Chicks, namanye abantu abasazowathokozela."

UNkosi uthi uqale ukuba nesiteshi sikamabonakude kusakhona iTop TV esasigxile emculweni wokholo.

"Ngemuva kwalokho sibe sesithola ithuba lokuthi sisebenzisane neMultichoice nokwathi uma kuleka iwindi lesinye isiteshi sezindaba, saphakamisa isandla, ngenhlanhla sathathwa, sasungula iNewzroom Afrika. Sasingazi lutho ngezindaba njengoba sasisuka emkhakheni wezokungcebeleka.

"Kodwa ngenxa yokuqoka abantu abafanele ezikhundleni ezifanele, okubalwa abahleli kuya kubafundi bezindaba nezintatheli, kuyasithokozisa ukuthi namanje sisamile futhi sibalwa phezulu eziteshini zezindaba kuleli," kusho yena.

UNkosi uqhakambise ukuvalwa kwezwe njengokube nomthelela ekukhuleni kweNewzroom Afrika. "Ngesikhathi izwe livaliwe sikwazile ukukhula ngenxa yokuthi ababukeli bebehleli emakhaya belindele ukubona izinto ezihlukile kumabonakude nathi njengesiteshi sezindaba kusisebenzelile ukwakha ababukeli abazogxila ngokugcwele ekutholeni izindaba kithina," esho.