I-MKP ifuna kuxoshwe uManyi

Usolwa ngokushushumbisa uZuma amhambise kumaGupta, yize iqembu seluyiphikisile eyalolu hambo...

 Thokozani  Ndlovu

BUTHUKUTHELE buthelwa ngamanzi ubuholi boMkhonto Wesizwe Party (MKP), ngokubonakala kukaMengameli  wale nhlangano uMnu Jacob Zuma, evakashele amaGupta.

Lobu buholi buthi lolu hambo lwachithwa emasontweni amathathu edlule, luphakanyiswa nguMnu Mzwanele Manyi (osesithombeni esingenhla) okhulumela iJacob Zuma Foundation.

ILANGA Lempelasonto lithole ngomthombo walo ukuthi iMKP yakhuza ibhadi ngesikhathi uManyi ephakamisa indaba yalolu hambo kuyona, ethi inhloso yalo ukuyothandazelwa kukaZuma, e-India.

 NguMnu Jacob Zuma osekusuke umsindo ngohambo lwakhe lokuvakashela amaGupta.

 Emuva kokunqatshwa kohambo yiMKP, kuthiwa uManyi uluhlele isinyenyela, wahambisa uZuma kumaGupta kungazi muntu kwiMKP.

“IMKP ibingeke ivumele uZuma ukuyohlangana namaGupta. Kumanje kusenemibuzo engakaphenduleki ngamaGupta njengoba abaleka eNingizimu Afrika ashiya amacala. Namanje awakapheli amacala awo afunelwa wona eNingizimu Afrika.

"Ngesikhathi uManyi ekhuluma indaba yalolu hambo, uchithiwe, akekho obazi ukuthi umengameli uya e-India, sonke sithuke sesibona esekhona, singazi. Umuntu odale yonke lento uMzwanele Manyi ngoba akafuni ukuphuma kumaGupta ngoba ake aba ngabaphathi bakhe eseyisikhulu se-ANN7, okwakuyisiteshi sethelevishini sawo,” kusho umthombo.

 NguMnu Jacob Zuma ngesikhathi evakashela amaGupta.

 Ebuzwa uManyi ngokuyisa uZuma kumaGupta, ukuqinisekisile ukuthi bekungelona uhambo oluhlangene neMKP.

“Uhambo lukaZuma lokuya e-India aluhlangene neMKP. Ngeke ngikudalule ukuthi ubeyokwenzani khona, kodwa ukuya kwakhe khona kufana nemfihlo ephakathi kukadokotela nesiguli. Yingakho ungazange ubone muntu ebuholini beMKP obeye khona. Ngeke ngande ngamaningi ngalokho, ngoba wuhambo oluyimfihlo lolu,” kusho uManyi.

Kumanje iMKP isikhiphe izingqwembe ezithi akuxoshwe uManyi kwiMKP ngoba kuyabonakala ukuthi ufuna ukuyixova. Kulezo zingqwembe kuthiwa uManyi uhamba umshosha-phansi, usebenzela amaGupta.

Okhulumela iMKP, uMnu Sfiso Mahlangu, akaluphendulanga ucingo lwakhe. Ufonelwe izikhathi ezahlukene, lukhala lungabanjwa. Wathunyelelwa nomyalezo nawo angawuphendulanga.

Ilungu leMKP, elalisebuholini obuphezulu, uMnu Magasela Mzobe, nalo likhiphe isitatimende elithe konke kumele kubhekiswe kuManyi ngohambo lukaZuma ukuyovakashela uMnu Ajay Gupta.

Linxuse iMKP ukuthi ithathe izinyathelo ezinqala ngoManyi njengoba kwenzeka kuNkk Duduzile Zuma-Sambudla ngendaba yaseRussia, nakuFloyd Shivhambu ngodaba lwaseMalawi.