Uvule ngegiya eliphezulu umhlangano kaJulayi eBuhleni

 Yingxenye yamaNazaretha asemhlanganweni kaJulayi, waseBuhleni.

Thokozani Ndlovu
noNhlanhla Hudla

UQALE ngegiya eliphezulu umhlangano kaJulayi webandla lamaNazaretha njengoba ephume ngobuningi ngesikhathi uvulwa ngoLwesithathu ngohla ka-1 July, ekomkhulu lebandla eBuhleni, eMzinyathi, KwaZulu-Natal.

Yize kugcwala uma kuyimihlangano yaleli bandla, kodwa amaNazaretha kawawuvali umlomo ngento ayibone yenzeka ngoLwesithathu, kuvulwa umhlangano kugcwele kunyinyitheka.

Okhulumela amaNazaretha neNkosi uMduduzi Shembe uNyazilwezulu, uMnu Thokozani Mncwabe, uthe kufakazeleka isiphrofetho seNkosi Amos Kula Shembe Inyangayezulu, eyathi lo mlilo ewubasile wamaNazaretha ngeke ucishwe wumuntu, kunalokho kuyosha ozama ukuwucisha.

“Ukugcwala ngalolu hlobo umhlangano usaqala, kuyinkomba yokuthi akuzobakhona ngisho indawo yokunyathela uma sonke sesiphelele eBuhleni. Ngesikhathi uqala umhlangano bekuseyiNhlalisuthi kuphela le ebigcwele ngalolu hlobo, kwalandela amakhosazana.

"Abanye abantu ikhona besazofika, okusho ukuthi akuzobakhona ngisho indawo yokuhamba. Silindele nezivakashi eziningi, okukhona kuzona osopolitiki nabezinye izinkolo njengoba kusuke kuvumeleke wonke umuntu,” kusho uMncwabe.

UMncwabe utshele ILANGA Lempelasonto ukuthi noma engeke abagagule abantu abahloniphekile abazofika njengoba kuwumhlangano kaJulayi, kodwa basilindele iSilo uMisuzulu kaZwelithini kulo mhlangano.

 AbaseBuhleni bathi balindele iSilo uMisuzulu ukuba sibe yingxenye kaMdedele okuwumhlangano kaJulayi.

Uthe kuqale uMdedele wenhlalisuthi, kwalandela owamakhosazana obe yizigaba eziyisikhombisa egida ngemvunulo ehlukene umgidi ngamunye. Uveze ukuthi ngenxa yokugcwala kakhulu, kuzophoqeleka ukuba kubhajadiswe masonto onke kuze kuphele uJulayi.

Kusasa ngeSabatha uthe inkonzo yokuqala kuzoba ngeyenhlalisuthi okuyiyona ezobe ishumayela ukuvula umhlangano. Ukukhethwa kwezintombi ebhentshini nemishado izophuma kuwo lo mhlangano ngasekupheleni kwenyanga.

Lo mgubho ulandela owaseLinda, oSuthu, KwaNongoma, owathatha amasonto amabili, nawo wawulandela owaseSwazini kwazise uNyazi lwaluvakashele khona.

UMncwabe uveze ukuthi lo mgubho ungomunye kwemikhulukazi yaleli bandla. Inhloso yawo wukunikeza bonke abantu ithuba njengoba ubizwa ngokuthi uMdedele. Uthi kulo mgidi abantu basuke bexhumana nabantu basemakubo abangasekho emhlabeni.