Isifo sofuba besibulala kodwa sesiyelapheka

Ngesonto eledlule bekukhunjulwa ababhubha ngenxa ye-tuberculosis

ESONTWENI esiphuma kulo, bekukhunjulwa abantu ababulawa yisifo sofuba (tuberculosis), umhlaba wonke. Ngeminyaka yama 40s, kuya kuma 60s, isifo sofuba sibulale inqwaba yabantu, ikakhulukazi e-Afrika, ngoba belingekho ikhambi laso.

Yingakho umbhali wezincwadi zesiZulu, ongasekho, uMnu Jotham Mncwango, waKwaNongoma, abhala incwadi esihloko sithi "Namuhla wumngcwabo wami - nawe," ebalisa ngokubhubhisa kwesifo sofuba, ngeminyaka yama-50s.

SIDALWA YINI ISIFO SOFUBA

Kunegciwane elinamandla, elaziwa
ngeMycobacterium Tuberculosis Bacteria (TB), elifike lidlavaze amaphaphu. Leli gciwane, lingasabalala nakwezinye izingxenye zomzimba.

Ukusebenza endaweni enentuthu, nokuphefumula umoya ongcolile, kuyasidala isifo sofuba. Ukubhema ugwayi, ngenye yezimbangela zesifo sofuba. Lesi sifo, siyathelelana, usithola uma umuntu onaso, ekhwehlela, ethimula, ecula, noma ehleka.  Amagciwane aso, ayasuka kuye angene kuwena, wena ongenaso.

Ukudla ngokhezo nepuleti elilodwa, nokuphuza ngenkomishi eyodwa, nomuntu onalesi sifo, kungenza utheleleke.

NAZI IZIMPAWU ZESIFO SOFUBA:

👉🏾 Ukukhwehlela okungapheli, okuthatha ngaphezu kwamasonto amathathu.
👉🏾 Ukuzwa ubuhlungu esifubeni.
👉🏾 Ukukhwehlela isikhwehlela, esinegazi.
👉🏾 Ukuqhaqhazela kube sengathi uyagodola.
👉🏾 Ukujuluka ebusuku.
👉🏾 Ukuncipha emzimbeni.
👉🏾 Ukuzizwa ukhathele.

Zikhona izikhungo ezelapha isifo sofuba, ogcinwa khona izinyanga eziwu-6, njengoba ukuselapha kungathathi ngaphansi kwalesi sikhathi.

Uma usuqalile ukwelashelwa isifo sofuba, qikelela ukuthi uyaqeda ukwelashwa, ngoba uma ungaqedile igciwane libuya selinamandla, seluwuhlobo lweXDR, okuwuhlobo lwegciwane elinamandla.

Abanye abantu uma isifo sofuba sesibaxine kakhulu, banikwa ikhefu emsebenzini, nasezikoleni, ukugwema ukuthi abanye abantu bangatheleleki.

SINGAGWEMEKA ISIFO SOFUBA:

✔️ Ukuzivocavoca, kuyawufaka umoya ohlanzekile, emaphashini.
✔️ Hlukana noma gwema ukubhema ugwayi.
✔️ Qhela endaweni enentuthu.
✔️ Yidla ukudla okunomsoco, nezakhamzimba, njengenyama, inhlanzi, amaqanda, amantongomane, nobhontshisi.
✔️ Phuza ubisi namanzi amaningi ekuseni.
✔️ Gwema ukuphuza utshwala, nezinye izinhlobo zezidakamizwa.

ISEXWAYISO: Isifo sofuba siyabulala uma ungazinakekeli, ngoba uma usunegciwane lesandulela-ngculaza, nengculaza, igciwane lesifo sofuba, liyacanasa ngoba amasosha omzimba asuke entekenteke.

• Ulwazi lucashunwe esikhungweni: iWorld Health Organisation (WHO)
menzi.jele@ilanganews.co.za