Baqhamuke nokwahlukile beqwashisa ngomdlavuza wabesilisa

Mthokozisi Dlomo

INHLANGANO engayenzi inzuzo iThe Factor of Ten Foundation, isiqhamuke nendlela eyehlukile yokukhuthaza impilo enhle kubantu besilisa eNingizimu Afrika ngokuletha umkhankaso wokuqwashisa nokuhlolela umdlavuza wendlala yesinye kwabesilisa (prostate cancer).

Lo mkhankaso, iProstate Cancer Victory 4000 (PCV 4000), oqondene nabesilisa abaphathela abadlali begalofu izinduku zokudlala (caddies) kuhloswe ngawo ukufinyelela kubantu abawu-4000 ezweni lonke ngaphambi kuka-2028, abazoqwashiswa, bahlolwe, belashwe maqede badlulisele ivangeli lokuhlolela lesi sifo emiphakathini abaphila kuyona.

Inhliziyo yePCV 4000 wumdlalo wegalofu ozobandakanya abaphathi bezikhwama zokudlala igalofu emincintiswaneni ewu-9 ebandakanya zonke izifundazwe.

Owokuqala ubuseSouthbroom Golf Club, KwaZulu-Natal, ngempelasonto, edlule  ubuhambisana nomtholampilo owumahambanendlwana oqondene nomdlavuza we-prostate.

“Sikholwa wukuthi ukuthola ulwazi olufanele nosizo lochwepheshe kungayishintsha indlela abesilisa ababuka ngayo isimo sezempilo. Ngokuthatha izingxoxo ezinjengalezi siziyise emiphakathini, siphonsela inselelo izinkoleloze, siqede ukwesaba kubantu besilisa, sibagqugquzele ukuthi bakhuthalele ukuhlolwa ukuze bezothola ukwelashwa isikhathi sisavuma,” kusho uMnu Jonathan Muthige, ongomunye wabasunguli beFactor of Ten Foundation, owanqoba lo mdlavuza.

Okumqoka kulo mkhankaso wukuthi abantu bafinyelele kongoti okubalwa kubona ama-urologist nama-oncologists, nabo abayingxenye yomdlalo wegalofu.

Ngesikhathi kudlalwa, abantu bazothola ithuba lokubuza mayelana nomdlavuza wendlala yesinye, izimpawu nobungozi bawo nezindlela wokwelashwa.

Ukwethulwa kwalo mkhankaso kwesekwe yiTempudu NPC, yi-Ampath, wuMnyango wezeMpilo KwaZulu-Natal esifundeni Ugu neSouthbroom Golf Club ehlinzeke ngendawo yokudlalela mahhala.

Sebebonke bawu-86 abaphathi bezikhwama zokudlala igalofu abebeyingxenye yalo mkhankaso.
UMnyango wezeMpilo esifundeni Ugu uhlinzeke abebeyingxenye yalo mkhankaso ukuhlolwa okwejwayelekile ezikhungweni zezempilo okubalwa ukuhlolwa komfutho wegazi, ushukela, amafutha emzimbeni (cholesterol), ukuhlolelwa isandulela-ngculaza nokunye.