NGUSIHLALO weMamelodi Sundowns, uThlopie Motsepe ebingelela abalandeli bale kilabhu.

ISITHOMBE NGABE: BACKPAGEPIX

Senzo Sokhela

USIHLALO weMamelodi Sundowns, uThlopie Motsepe, wenza isicelo kubalandeli beMamelodi Sundowns njengoba kuqala isizini entsha.

IDowns izobhekana neRichards Bay kwiQuarter final yeMTN8 ngeSonto ngo-18h00 eLucas Moripe Stadium, e-Atteridgeville.

UMotsepe uthi ngale sizini kuzobonakala iSundowns ehlukile, yingakho enza isicelo kubalandeli bale kilabhu.

"Isizini entsha iyaqala kanti iza namathuba ahlukile. Ngale sizini sizophendula imibuzo yokuthi siluhloboni lwekilabhu, nokuthi yini esihlose ukuyenza.

"Abadlali bethu nabaqeqeshi bethu bakhombisile ukuthi singancintisana nezinkakha zasemhlabeni. Osekusele manje wukuthi abalandeli bethu bayihambe nathi le ndlela, baphume ngobuningi babo uma sidlala.
Sishaya kwasani ensimini, osekusele manje wukuthi nasezihlweleni sinqobe ngokuba nabalandeli abaningi, kugqame umbala wethu ophuzi.

"Kawubi yikilabhu enkulu ngokunqoba izinkomishi nje kuphela, kodwa nobuningi babalandeli bakho bumqoka.

"Ngale sizini siyabacela baphume kakhulu kunakuqala, ake kugqame umbala wethu ophuzi noma ngabe sidlala nobani,'' kusho uMotsepe.

ISITHOMBE NGABE: BACKPAGEPIX

IDowns iya kulo mdlalo nje, ibuya kwiFifa Club World Cup lapho ethole khona isipiliyoni igudlana ngamahlombe nezinkunzi zebhola emhlabeni. Yize ibuye ekuseni, kodwa idlale ibhola elineNkosi phakathi. Linconywe ngisho nanguRio Ferdinand owayeyisitobha seManchester United yase-England.

Kulo mqhudelwano ivule eyamaqoqo ngokuhlula i-Ulsan yaseSouth Korea ngo-1-0, yatibilisa iBorussia Dortmund yaseGermany yize igcine idliwe ngo-4-3, yavala ngokudlala ngokulingana neFluminense yaseBrazil, kuba ngu-0-0.

IBay yona izoya e-Atteridgeville ihambela phezulu emuva kokuqukula inkomishi yeKwaZulu-Natal Premier's Cup ngokuhlula iDurban City engomakoti beBetway Premiership.