Uthole ikhaya kwiBetway Premiership oxoshwe kwiMFC

NGUNJABULO Ngcobo osanda kujoyina iSiwelele FC.

Mfanafuthi Ndlovu

UGCINE enikwe inkontileka yonyaka enombandela wokwelulwa uNjabulo Ngcobo oyisitobha,osethathwe yiSiwelele FC ededele inqwaba yabadlali emasontweni edlule.

ILANGA Lempelasonto lithole ukuthi uNgcobo ujabulile ngokunikwa ithuba lokubuyela kwiBetway Premiership ekubeni ubesehlale isizini yonke engadlali kwiCape Town City eyibamba kwiMotsepe Foundation Championship (MFC), egcine ngokumfaka amasondo ngeledlule.

ISIWELELE FC inethemba lokuthi uNjabulo Ngcobo uzobuyisa leyaya fomu ayikhombisa esagijima kwiSwallows FC eminyakeni edlule.

USboniso Ngubane ophethe izindaba zalo mdlali, utshele leli phephandaba ukuthi ubonga abaphathi beSiwelele FC ngokumnika inkontileka. Uthe ubenakho ukukholelwa ekutheni uNgcobo usenalo ikusasa esigabeni esikhulu, yize abaningi besebemlahlile.

"Kwehle umthwalo omkhulu kimina ngokuhlabana ngethuba elingaka. Ngimdonse ngendlebe ukuthi kufanele akhohlwe yikhona konke okungaphandle kwenkundla, abhekane nomsebenzi awuqashelwe. Ngixoxile neSiwelele FC, bathembisa ukuthi uma ebuyisa izinga lakhe langesikhathi esakwiSwallows FC, bazoyelula inkontileka yakhe.

AKUKACACI ngekusasa likaSamkelo Zwane njengoba ededelwe yiSiwelele FC, abebolekiswe kuyona yiKaizer Chiefs.

"Okuningi abangakwazi abantu wukuthi uNgcobo ubefunwa uthuli nayiKruger United engomakoti kwiBetway Premiership kepha waqoma iSiwelele FC. Ngimfisela konke okuhle," esho.

ISiwelele FC idedele uHappy Mashiane, uGhampani Lungu, uBohlale Ngwato, uNeo Rapoo, uLazola Maku, uKgaogelo Sekgota, uPogiso Sanoka, uMaloisane Mokhele, uLyle Lakay, uSamkelo Zwane obuyele kwiKaizer Chiefs, ukubala nje abambalwa.