Usonga ukuvuka ngomkhaya umqeqeshi woSuthu

NGUMQEQESHI wamaZulu FC Reserves, uMncedisi Sibiya.

ISITHOMBE NGABE: BACKPAGEPIX

Senzo Sokhela

UTHEMBISA ukuqeda ishobolo ngomkhaya babo umqeqeshi wamaZulu FC Reserves uMncedisi "Dada" Sibiya.

USuthu luzobhekana neDurban City koweDStv Diski Challenge (DDC) ngeSonto ngo-12h00 ePrincess Magogo Stadium, KwaMashu.

Le kilabhu kaSandile Zungu iya kulo mdlalo nje, ibhabhadiswe yiMamelodi Sundowns Reserves ngo-3-0 ngeledlule ePrincess Magogo Stadium.

KULINDELEKE ukuba u-Andile Ngwenya weCity axine abadlali boSuthu njengoba enza kuWandile Ngema weRichards Bay FC.

ISITHOMBE NGABE: BACKPAGEPIX

USibiya ekhuluma naleli phephandaba, uthe bazimisele ngokuqeda ishobolo lokwehlulwa ngomkhaya babo.

"Silindele umdlalo onzima kubona kwazise bathole iphuzu bedlala neRichards Bay Resevers, beshaya igoli umdlalo usuyophela.

"Ngebhadi, thina sehluliwe emdlalweni wethu owedlule, kodwa-ke okuhle ngalo mdlalo wukuthi kasidingi ukulokhu sikhuthaza abadlali, konke kuyazenzakalela njengoba sibhekene nomakhelwane bethu.

"Engifuna ukukuqinisekisa wukuthi siyovuka ngabo omkhaya, ngeke sikuvumele ukuthi sehlulwe kathathu kulandelana. Kulo mdlalo sizokwenza isiqiniseko sokuthi sibuya nawo womathathu amaphuzu," kusho uSibiya.

Imidlalo yeDDC isiyonke ngale mpelasonto iqhathwe kanje:
NGOMGQIBELO
E-Isak Steyl: Sekhukhune Reserves vs Chippa Reserves 10h00.
E-UJ Soweto Campus: Pirates Reserves vs Stellenbosch Reserves 10h00.
EPrincess Magogo Stadium: Richards Bay Reserves vs Orbit College Reserves 10h00.
ETuks Stadium: Sundowns Reserves vs Arrows Reserves 10h00.
NGESONTO
E-UJ Soweto Campus: Siwelele Reserves vs Polokwane Reserves -10h00.
ESeshego Stadium: Magesi Reserves vs TS Galaxy Reserves 10h00.
EWits Football Stadium: Chiefs Reserves vs Marumo Reserves 12h00.
EPrincess Magogo Stadium: AmaZulu Reserves vs Durban City Reserves 12h00.