NGU-LUCAS Ribeiro noTashreeq Matthews abangabagadli beDowns.

ISITHOMBE NGABE: BACKPAGEPIX

Mfanafuthi Ndlovu

INGASE ilahlekelwe wunyazi lomgadli, uLucas Ribeiro waseBrazil iMamelodi Sundowns ephume inqina kaMabuyaze nawo wonke amakilabhu ebeyimele nawo i-Afrika kwiFifa Club World Cup eqhubeka e-United States of America (USA), njengoba womane ewawashe zisuka nje ebhandeni amajezi.

I-Afrika beyimelwe yi-Al Ahly yaseGibhithe, i-Esperance yaseTunisia, yiWydad Casablanca yaseMorocco neSundowns kulo mqhudelwano obewuqala ukugijinywa ngamakilabhu awu-32 nonyaka.
Womane ehlulekile ukudlulela kwi-last 16 njengoba ebambe izindiza ezibuyela e-Afrika zisuka nje ngokwehlukana.

Nokho iSundowns iyibekile induku ebandla njengoba inconywa ngokugijima ingcwenga kanobhutshuzwayo. Phakathi kwabadlali bayo abasike ukhasi kukhona noRibeiro okuvele ukuthi ufunwa uthuli yi-AS Saint-Etienne egijima kwiLigue 2 yaseFrance.

NGU-PETER Shalulile.

ISITHOMBE NGABE: BACKPAGEPIX

Nokho umthombo uthi abaphathi beDowns kabazimisele ngokulahlekelwa nguRibeiro ngenxa yekhono lakhe njengoba enokuyitakula kunzima le kilabhu ngokuyishayela amagoli amqoka.

"Kuzomele ikilabhu efuna uRibeiro ingagodoli nemali ngoba uzomba eqolo," kusho umthombo.

Kuvela ukuthi iSaint Etienne ibeke u-R41.5 million wokuthenga lo mdlali.
Kubuye kwaqhamuka izindaba ezithi noPeter Shalulile ongomunye wabagadli beDowns ukhokhobelwa ngamakilabhu aseMiddle-East.
Imizamo yokuthola uShupi Nkgadima okhulumela iDowns iphunzile.