Ihlose ukuya ekhefini le-URC ngegiya eliphezulu iSharks

Sazi Mkhwanazi

IZIMISELE ngokuya ekhefini ngenothi eliphezulu iHollywoodbets Sharks ebhinjelwa yizinto kwi-United Rugby Championship (URC) njengoba isanqobe umdlalo owodwa kwemine esayigijimile kule sizini.

ISharks - ebophele ulozolo lwabadlali, abanye babo abawumgogodla weqembu lesizwe, AmaBhokobhoko - izobhekana neScarlets yaseWales ngoMgqibelo ngo-16h00 eHollywoodbets Kings Park Stadium, eThekwini, kowe-URC ezoke ithi gozololo isikhathi esingangenyanga njengoba izoze ibuye ngempelasonto yokugcina kuNovember.

Iya kulo mdlalo nje, izikhotha amanxeba njengoba kowedlule iguqiswe yi-Ulster yase-Ireland ngo-34-26 isekhaya.

Umqeqeshi woShaka, uJohn Plumtree wenze izinguquko ezimbalwa eqenjini lakhe, ezinye zazo eziphoqwe wukumiswa kukaMakazole Mapimpi imidlalo ewu-5 engabonakali enkundleni.

UMapimpi - okhishwe nasohlwini lwabadlali abawu-10 okuqashwe ngabo ingozi kumaBhokobhoko azoba nemidlalo ewu-5 yeCastle Lager Outgoing Tour ngenyanga ezayo - umiselwe ukugingqa kabuhlungu umdlali wasemuva we-Ulster, uMichael Lowry ngesikhathi la maqembu ebhekene ngeledlule.

NGUMAKAZOLE Mapimpi egingqa uMichael Lowry.

ISITHOMBE NGABE: BACKPAGEPIX

U-Andre Esterhuizen ongumdlali wasesiswini kwiSharks, uthi okubalulekile njengoba beyobhekana neScarlets - esemsileni we-log njengoba ingakaze inqobe ngisho owodwa umdlalo kwewu-3 esayigijimile - wukudlala ngokubambisana, nokusebenzisa abakufunde ngesikhathi bebhekene ne-Ulster.

Uthe ubheke ukuba izitha zigadle ngamandla.

"Njalo uma sidlala nabo, kusiphuka izidindi. Silindele umdlalo onzima, kuhlale kunjalo uma sibhekene namaqembu aseWales, phela anakho ukudlala umbhoxo oneNkosi phakathi. Ngakho-ke kuzomele sifake umfutho owengeziwe kulo mdlalo," kusho lo mdlali okhulele ezikwatini ezincane zeSharks.

Limi kanje iqembu leSharks elizobhekana neScarlets: u-Ox Nche, uBongi Mbonambi, uVincent Koch, u-Eben Etzebeth (c), uMarvin Orie, uSiya Kolisi, uVincent Tshituka, u-Emmanuel Tshituka, uGrant Williams, uSiya Masuku, u-Edwill van der Merwe, u-Andre Esterhuizen, uLukhanyo Am, u-Ethan Hooker noJordan Hendrikse.

Abasebhentshini:- uFez Mbatha, uCameron Dawson, uLee-Marvin Mazibuko, uJJ Scheepers, uPhepsi Buthelezi, uJaden Hendrikse, uJean Smith noJurenzo Julius.

* Komunye umdlalo, kulindeleke ukuba iDHL Stormers iqhubeke nokuphephezelisa ifulegi leNingizimu Afrika kule midlalo uma isibhekene neBenetton yase-Italy ngoMgqibelo ngo-18h30 ekuhambeni. IStormers yiyona eqhwakele kwi-log njengoba isayinqobe yonke imidlalo yayo.
Isiyonke imidlalo ye-URC engale mpelasonto imi kanje:-
NGOLWESIHLANU
Glasgow Warriors vs Bulls 20h45.
NGOMGQIBELO
Lions vs Ulster 16h00.
Sharks vs Scarlets 16h00.
Dragons vs Ospreys 18h30.
Benetton vs Stormers 18h30.
Leinster vs Zebre 18h30.
Munsters vs Connacht 20h45.
Cardiff vs Edinburgh 20h45.