NGU-BENNET Mokoena weDowns edukisa u-Ayabulela Maxwele weLamontville Golden Arrows koweDDC.

ISITHOMBE NGABE: BACKPAGEPIX

Senzo Sokhela

UFUNA ukuphula irekhodi likaBoitumelo Radiopane we-Orlando Pirates umgadli weMamelodi Sundowns Reserves ongalibheki ipali kwiDStv Diski Challenge (DDC).

IDowns Reserves izodudulana neTS Galaxy Reserves koweDDC ngeSonto ngo-12h00 eSolomon Mahlangu Stadium, KwaMhlanga.

UBennet Mokoena ongumgadli weSundowns, ugila izimanga kwiDDC njengoba esehlohle amagoli awu-5 emidlalweni ewu-6 asayigijimile ngale sizini.

NGU-RADIOPANE ehleli nozakwabo kwiPirates, uKarim Kimvuidi (osegijima kwiFC Ashdod yakwa-Israel) noTshegofatso Mabasa.

ISITHOMBE NGABE: BACKPAGEPIX

Uthi uhlose ukuphula irekhodi likaRadiopane lamagoli awu-25 alibeke esadlala kwiPirates Reserves ngesizini ka-2021/2022.

"Ngale sizini ngizimisele ngokuhlohla inqwaba yamagoli, ngifuna ukukwenza lokho kuyo yonke imidlalo engizoyigijima.

"Ngifuna amagoli awu-30 ngale sizini, futhi lokho kungenzeka. Kunezinto ezincane nje okusafanele ngizilungise emdlalweni wami, kodwa khona kungenzeka," esho.

UMokoena useke wagijima umdlalo owodwa ngale sizini eqenjini elikhulu leDowns eliyibamba kwiBetway Premiership, okuyinkomba yokuthi unekusasa eliqhakazile kulo mdlalo.

Isiyonke imidlalo yeDStv Diski Challenge engale mpelasonto iqhathwe kanje:-
NGOMGQIBELO
ESeshego Stadium: Magesi Reserves vs Chiefs Reserves 10h00.
EPrincess Magogo Stadium: Richards Bay Reserves vs Chippa United Reserves 12h00.
E-Isak Steyl Stadium: Sekhukhune United Reserves vs Siwelele Reserves 12h00.
ESugar Ray Xulu Stadium: Golden Arrows Reserves vs Marumo Gallants Reserves 12h00.
NGESONTO
E-Old Peter Mokaba Stadium: Polokwane City Reserves vs Orlando Pirates Reserves 10h00.
E-Olympia Park: Orbit College Reserves vs AmaZulu Reserves 10h00.
E-Idas Valley Sports Ground: Stellenbosch Reserves vs Durban City Reserves 10h00.
ESolomon Mahlangu Stadium: TS Galaxy Reserves vs Mamelodi Sundowns Reserves 12h00.