NGU-OLISA Ndah ebelethe uzakwabo uThabiso Sesane abayibamba naye emuva kwiBucs. 

ISITHOMBE NGABE: BACKPAGEPIX

Senzo Sokhela

UHLEKA yedwa umqeqeshi we-Orlando Pirates, u-Abdeslam Ouaddou, njengoba kubuye ngokugcwele izingwazi zakhe ezimbili obesekuphele isikhathi eside zilimele.

IBucs izodudulana neDurban City koweBetway Premiership ngoMgqibelo ngo-15h30 eMoses Mabhida Stadium, eThekwini.

Iya kulo mdlalo nje, ihambela phezulu emuva kokuguqisa  iChippa United ngo-2-0 koweligi ngoLwesibili ebusuku e-Orlando Stadium, eSoweto.

Kulo mdlalo, u-Ouaddou ufake ebhentshini u-Olisa Ndah odlala emuva, noMakhehleni Makhaula odlala esiswini, abebengakaze babonakale selokhu kuqale le sizini.

UNdah besekuphele unyaka nezinyanga engabonakali, kwazise walimala ngoMandulo (September) nyakenye.

Akadlalanga koweChippa, kanti uMakhaula uyitholile imizuzu embalwa njengoba efakwe ngesiwombe sesibili.

UFAKAZELE ukukhuluma kwasebholeni kokuthi "kudlula indoda kusala ibhola, noma kudlula ibhola kusala indoda" uJohn Madingwane weChippa enkonkoshela uMakhehleni Makhaula weBucs obuya ekulimaleni. 

ISITHOMBE NGABE: BACKPAGEPIX

U-Ouaddou uthi ukubuya kwalaba badlali kumenza aphathwe yikhanda elimnandi.

"Kuyangijabulisa ukubuya kwalaba badlali, kwenza ngiphathwe yikhanda elimnandi uma kufanele ngibophele isikimu.

"Ukubuya kwabo kwenza umbango wejezi ushube. Kodwa okungijabulisa nakakhulu, wukuthi babuya ngesikhathi esikahle sisemkhankasweni wokunqoba isicoco seligi, okuwumbandela esibekelwe wona.

"Uma ufuna le nkomishi yeligi udinga bonke abadlali bakho baphelele, ngakho-ke kuyangijabulisa ukubuya kwabo," esho.

NGU-JOSLIN Kamatuka oyifolosi leDurban City, ehola ozakwabo bejabulela igoli.

ISITHOMBE NGABE: BACKPAGEPIX

Uma iPirates iwunqoba lo mdlalo izoqhwakela kwi-log, futhi ivule igebe lamaphuzu amathathu kwiMamelodi Sundowns esesicongweni njengamanje.

IDowns iqhwakele ngamaphuzu awu-25 emidlalweni ewu-12 kanti iBucs iyisibili ngamaphuzu afanayo, emidlalweni ewu-11.