NGABADLALI bePirates bejabula nomqeqeshi wabo, u-Abdeslam Ouaddou (ofake isudi emnyama) emuva kokunqoba iCarling Knockout Cup.

ISITHOMBE NGABE: BACKPAGEPIX

Senzo Sokhela

UHLOSE ukutshala imbewu yokungabhenywa kubadlali bakhe umqeqeshi we-Orlando Pirates, u-Abdeslam Ouaddou.

IBucs izobhekana neCarling All-Stars koweCarling Cup ngoMgqibelo ngo-15h00 eMoses Mabhida Stadium, eThekwini.

Izithola inalo mdlalo nje, yingoba yiyona ebe yizingqwele zeCarling Knockout iguqisa  iMarumo Gallants ngo-1-0 ngeledlule ePeter Mokaba Stadium, ePolokwane.

Izokuya kulo mdlalo ngaphandle kwabadlali bayo abawu-8 abaseqenjini lesizwe laseNingizimu Afrika, iBafana Bafana njengoba lenza amalungiselelo e-Africa Cup of Nations (Afcon) ezoqala ngelizayo eMorocco.

Laba badlali nguSipho Mbule, nguSipho Chaine, nguThalente Mbatha, ngu-Evidence Makgopa nguMbekezeli Mbokazi, nguNkosinathi Sibisi, nguRelebohile Mofokeng no-Oswin Appollis.

NGUMQEQESHI weBucs, u-Ouaddou.

ISITHOMBE NGABE: BACKPAGEPIX

U-Ouaddou uthi ufuna ukugcina abadlali bakhe bewupelepele kuyona yonke imidlalo.

Uthi lokhu ufuna kukhule ngaphakathi kubona ukuba nelukuluku lokuqoba kwasani abadlala nayo.

"Uma uyikilabhu enkulu njengePirates, yonke imidlalo oyigijimayo kufanele ulwele ukuyinqoba.

"Nalo mdlalo siyela ukuyowunqoba, ngifuna ukuyitshala imbewu yokunqoba kubadlali bami, ihlale ingaphakathi kubona.

"Isicelo nje enginaso kubalandeli bethu, wukuthi baphume ngobuningi babo ukuyoseseka njengoba siya kulo mdlalo.

"Ngiyathembisa ukuthi noma kanjani, sizokulwela ukuyinqoba nale nkomishi," kusho u-Ouaddou.

Amathikithi alo mdlalo aseyatholakala kanti abiza u-R40 e-Open tickets.

IPirates iyizingqwele zeCarling Knockout nje, beyingaqali ukuqukula inkomishi kule sizini njengoba izibule ngeMTN8 ebisiyinqoba okwesine iminyaka ilandelana.

Kubhekwe ukuthi umdlalo weCarling Cup uhanjelwe ngabalandeli abaningi njengoba kungowokugcina nonyaka ngaphansi kwehlelwa yiPremier Soccer League (PSL).