BANXUSA uNdunankulu waKwaZulu-Natal, uMnu Thami Ntuli nongqongqoshe wakhe wezempilo, uNkk Nomagugu Simelane-Mngadi ukuba baqhubeke nokuzama ukuxazulula inkinga ababhekene nayo odokotela abangaqashiwe

ISITHOMBE YI: NQOLOBANE YELANGA

Thandi Zondi

ODOKOTELA abangaqashiwe, bathi bayasemu-kela isimemezelo sikaNgqongqoshe wezeMpilo KwaZulu-Natal, uNkk Nomagugu Simelane-Mngadi noNdunankulu uMnu Thami Ntuli, sokuthi bazovala izikhala zodokotela nezisebenzi zezempilo eziwu-20, ukuze kubhekwane nenkinga yokushoda kwezisebenzi ezikhungweni zezempilo.

"Nokho kumele sikucacise ukukhathazeka nokuphoxeka kwethu. Lokhu kungenelela kakwanele ukubhekana nesimo esiphuthumayo sodokotela abangaphezu kuka-137 KwaZulu-Natal, abangaqashiwe kuze kube manje, yize sebeluqedile uqeqesho (community service).
 
"Ukuvalwa kwezikhala eziwu-20 siyakwamukela kepha, ziyingxenyana yesisombululo yenkinga eqhubekayo ezibhedlela eziningi nasemitho-lampilo kulesi sifundazwe.

"Izindawo ezibucayi zisaqhubeka nokushodelwa yizisebenzi, kanti nemiphakathi eminingi iyaqhubeka nokuhlukumezeka ngenxa yokushoda kwezisebenzi zezempilo," kusho isitatimende sabo.

Siqhuba sithi ezinye izifundazwe zizovala izikhala ezithe xaxa, ngokuqasha odokotela abahleli emakhaya.

"Siyagcizelela ukuthi ilungelo lezempilo libalulekile. Ukuba khona kwezisebenzi zezempilo eziqeqeshiwe, kuyingxenye yokuhambisa lelo lungelo (kubantu). Akwamukelekile ukuqhubeka kokungaqashwa kodokotela abaqeqeshiwe, iziguli zibe zihlezi emitholampilo nasezibhedlela ezichichimayo," kusho isitatimende.

NGUNDUNANKULU waKwaZulu-Natal, uMnu Thami Ntuli nongqongqoshe wakhe wezempilo, uNkk Nomagugu Simelane-Mngadi.

Banxuse uNtuli noNkk Simelane-Mngadi ukuba baqhubeke nokuzama ukuxazulula eyodokotela abangaqashiwe.

"Sizimisele ngokusebenza. Esikucelayo yithuba lokwenza njalo. Sizoqhubeka nokuqhinqa kuze kube sivuna izithelo ezinhle," besho.

UNkk Simelane-Mngadi uthe izikhala okwakukhulunywe ngazo eziwu-800, ziphethwe kuzwelonke, zonke izifundazwe zizohlukaniselana kulesi sibalo.

Uthe eminyakeni ewu-5 eyedlule, umnyango wakhe wehliselwe ibhajethi ngo-R14 billion, okwenze kwabanzima ukwengeza izisebenzi. Uthe yize kunjalo, bayaqhubeka nemizamo yokuthola imali, besebenzisana nezinye izinhlaka.

Ucele ukuba kwehliswe imimoya ngesikhathi umnyango usazama ukuxoxa nodokotela abathintekayo, nezisebenzi zezempilo.