Senzo Sokhela

WESHELWA yikilabhu yase-Europe umdlali waKwaZulu-Natal osanda kugijima umdlalo wakhe wokuqala eqenjini lesizwe lseNingizimu Afrika, iBafana Bafana.

Leli phephandaba lithole ngemithombo yalo ukuthi uKhulumani Ndamane (21), odlala emuva kwiTS Galaxy ufunwa uthuli yiFC Steaua Bucuresti (FCSB) yaseRomania okudlala kuyona uSiyabonga Ngezana odume kwiKaizer Chiefs.

UNdamane ujoyine iGalaxy ekuqaleni kwesizini edlule esuka eqenjini leChiefs leDStv Diski Challenge (DDC).
Ufike eqenjini elikhulu leGalaxy isikimu kwaba ngesakhe, waze waheha neso lomqeqeshi weBafana uHugo Broos.

Ngeledlule udlale umdlalo wakhe wokuqala kwiBafana ibambana neTanzania ngo-0-0 ePeter Mokaba Stadium, ePolokwane.
Leli phephandaba lithole ukuthi iFCSB imufuna uthuli kangangoba isike yaxoxa nomphathi wakhe, uSihlangu Sithebe.

NGU-TIM Sukazi ongumphathi weTS Galaxy.

ISITHOMBE NGABE: BACKPAGEPIX

Umthombo waleli phephandaba uthe: "Le kilabhu ishayele ngqo umfana wabe eseyikhomba kuSithebe umphathi wakhe. Kuthiwa uzame ukuxhumana noTim Sukazi ongumnikazi weGalaxy, kodwa kwanhlanga zimuka nomoya.

"Kuthiwa uvele wayalela le kilabhu ukuba ixhumane noSukazi ngoba usanenkontilela neGalaxy."

Leli phephandaba lishayela uSithebe uthe: "Engingakuqinisekisa wukuthi ikhona ikilabhu yase-Europe eke yangishayela ngoNdamane, kodwa ngeke ngikwazi ukuyisho igama okwamanje."

Imizamo yokuthola uSukazi iphunzile njengoba ucingo lwakhe belukhala kodwa lungabanjwa.