NGUMENZI Chili weMilford onxusa abalandeli ukuphuma ngezinkani uma le kilabhu isibhekene neVenda FC.

ISITHOMBE NGABE: BACKPAGEPIX

Mfanafuthi Ndlovu

KUBUYA umgadli omqoka weMilford FC ezobhekana neVenda FC koweMotsepe Foundation Championship (MFC) ngoMgqibelo ngo-15h00 eMhlathuze Sports Complex, eRichards Bay.

Leli phephandaba litshelwe nguDkt Xanti Pupuma - ongumnikazi wale kilabhu, futhi ongumqeqeshi wayo - ukuthi kumqinisa idolo ukululama ngokugcwele kukaSiphosethu Ndlabi ongumgadli.

Umdlali okusabanjwe umoya ngaye njengoba esalulama, nguNande Jodwana olihlikihla esiswini. Kulindeleke ukuthi uNdlabi abe yingxenye yalo mdlalo obhekwe ngabomvu ngabathandi bakanobhutshuzwayo baseMhlathuze namaphethelo, njengoba le kilabhu izokube iqala ukugijima kule ndawo esizinze kuyona.

Phela selokhu yathenga igunya loThongathi FC lokugijima kulesi sigaba, beyilokhu idlalela ezinkundleni zaseThekwini ngenxa yokuthi iMhlathuze Sports Complex ibisalungiswa.

UMenzi "Deco" Chili ongomunye wabagadli beMilford, unxuse abalandeli ukufika ngezinkani ukuyobafaka ugqozi lokujika izinto njengoba bengenzanga kahle emdlalweni odlule.
Uthe kule sizini bazolwela ukunyusela le kilabhu kwiBetway Premiership.

NGUSIPHOSETHU Ndlabi weMilford obuya ekulimaleni.

ISITHOMBE NGABE: BACKPAGEPIX

Kubadlali beMilford ababhekiwe ukushubisa lo mdlalo kukhona uNqaba Xulu, uMvelo Zikakayo noSifiso Mdluli kanti kwiVenda FC kukhona uSbusiso Sibeko, uMotebang Sera noDeolin Mekoa.

* IPremier Soccer League (PSL) inqume ukuyihlehlisa yonke imidlalo yeBlack Leopards ukuyinika ithuba lokulungisa inkinga enayo yokungakwazi ukusayinisa abadlali njengoba igwetshwe yiFifa ngecala leCape Town All Stars.

Phela abanikazi beLeopards bathenga igunya le-All Stars lokudlala kwiMFC, okwenza wonke amacala eStars awele kuyona.

Isiyonke imidlalo yeMFC engempelasonto imi kanje:
NGOMGQIBELO
E-Athlone: Cape Town City vs Casric Stars 15h00.
EMhlathuze Sports Complex: Milford FC vs Venda FC 15h00.
ENorth West University: Lerumo Lions vs Kruger United 15h00.
EMxolisi Dicky: Hungry Lions vs Leicesterford City 15h00.
NGESONTO
KaNyamazane: The Bees vs Midlands Wanderers 15h00.
E-TUT Stadium: Gomora United vs University of Pretoria 15h00.
EGelvandale: Highbury vs Baroka FC 15h00.