Ucelela umthandazo iMidlands esathuka isisinga

NGUSDUDUZO Dlamini weMidlands Wanderers.

ISITHOMBE NGABE: BACKPAGEPIX

Mfanafuthi Ndlovu

UCELELA iMidlands Wanderers umthandazo kubalandeli umdlali wale kilabhu eyiqale kabi isizini kwiMotsepe Foundation Championship (MFC) engomakoti kuyona.

IWanderers izovakashela iLerumo Lions ukuyodudulana nayo koweMFC ngeSonto ngo-15h30 eNorth West University.

Le kilabhu iyiqale ngebatha imidlalo yakulesi sigaba njengoba isathuka isisinga, kwazise iphuma esigabeni sama-amesha seSafa KZN ABC Motsepe League.

NGUMNIKAZI weLerumo Lions, uSbongile Marokana enomunye wabadlali bezakhe.

USduduzo "Sdu" Dlamini oyisiphekepheke kule kilabhu, utshele ILANGA Lempelasonto ukuthi babhekene nobunzima bokungazazi izitha zabo ukuthi ziphetheni.

Nokho uthi bazolwela ukuthi izitha zingalitholi igoli kuqala ngoba lokho kungabathena amandla, kubakhandle nemiqondo.

Ugcizelele eyokuthi iyabakhathaza indaba yokuthi selokhu kuqale isizini, isimo kasihambi kahle kubona.

Ucelele le kilabhu umthandazo kubalandeli ukubuya namaphuzu agcwele emidlalweni ebasalele kulo nyaka.

IWanderers izinze eMgungundlovu, kanti yiyona neMilford FC yaseRichards Bay abamele iKwaZulu-Natal kwiMFC. 

Isiyonke imidlalo yeMFC engempelasonto imi kanje:-
NGOLWESIHLANU
EThohoyandou: Venda FC vs Black Leopards 15h30.
NGOMGQIBELO
ESolomon Mahlangu: Kruger United vs Casric Stars 15h30.
EDobsonville: Leicesterford City vs Baroka FC 15h30.
E-Athlone: Cape Town City vs Upington City 15h30.
E-Absa Tuks: University of Pretoria vs The Bees 15h30.
NGESONTO
EMxolisi Dicky: Hungry Lions vs Gomora United 15h30.
ENorth West University: Lerumo Lions vs Midlands Wanderers 15h30.
EGelvandale: Highbury FC vs Milford FC 15h30.