Nhlanhla Hudla

BAMBONA esezokuba yinsika nakwiBafana Bafana uThembinkosi Lorch oshaye into ecokeme kwiWydad Casablanca yaseMorocco yize iphume ekuseni kwiFifa Club World Cup eqhubeka e-United States of America (USA).

Ukudlala ingcwenga kukaLorch kulo mqhudelwano, kwenze owayengumhlaziyi wezemidlalo oKhozini FM, uJoe Nxumalo, wambona engaba yisixazululo esikhulu kwiBafana uma seyigijima kwi-Africa Cup of Nations (Afcon) ezokuba seMorocco kusuka kuDecember isongwe ngoJanuary wonyaka ozayo.

Ibhola likaLorch kule midlalo lenze abantu abaningi bacula enye ingoma ngaye kwazise bekubonakala sengathi sekuphelile ngalo mdlali owathengwa yiMamelodi Sundowsns kwi-Orlando Pirates, ngaphambi kokuba alandwe nguRulani Mokwena ukujoyina iWydad.
Nokho uMokwena sewashiya kule kilabhu yaseMorocco.

NGU-LORCH ephungwa ngezithembe ngesikhathi ezakhe zibhekene ne-Al Ain yase-UAE. Lapha uRamy Rabia ubezama ukumnqanda.

ISITHOMBE NGABE: BACKPAGEPIX

Ekhuluma neLANGA Lempelasonto uNxumalo, uthe lo mdlali kakukho lapho angeke adlale khona emhlabeni, yinqobo nje uma engalungisa amaphutha akhe angaphandle kwenkundla.

"Ungumdlali osezingeni lakhe yedwa, futhi lokho ukukhombisile kule midlalo. Angadlala noma yikuyiphi iligi enkulu. Bheka indlela abezenzela ngayo ezitobheni zeManchester City yase-England.

Lokho kukubeka ngokusobala ukuthi ukuliphi izinga. Into nje emhluphayo yizindlela zobumnyama, uma engalungisa zona angaya kude. Into engamlekelela wukuthi adlale kulezi zindawo zama-Arab lapho abadlali beqashwa khona ngeso lokhozi," esho.

Ukudlala kahle kwalo mdlali kungaba yizindaba ezimnandi kuHugo Broos ongumqeqeshi weBafana njengoba ezama ukuqhubeka nokubuyisa udumo lwaleli qembu, okuyinto ayiqalile ngesikhathi bephuma unombolo 3 kwi-Afcon ebise-Ivory Coast ngasekuqaleni konyaka odlule.

KwiFifa Club World Cup, uLorch ushaye elihle igoli ezakeh zibhuquziswa yiJuventus ngo-4-1, kanti nasemdlalweni wokusonga eyamaqoqo, abadliwe kuwona yi-Al Ain yase-United Arab emirates (UAE) ngo-2-1, ubenza kahle.