NGUMOKHOSI Mohapi ongunobhala-jikelele weLeFA.

Senzo Sokhela

UNOBHALA-JIKELELE weLesotho Football Association (LeFA), uMokhosi Mohapi, uxwayisa iSouth African Footbal Association (Safa) ngoTebogo Mokoena odlala esiswini kwiBafana Bafana ukuba angaboshelwa uma la mazwe asebhekene.

IBafana izodlala neLesotho koka-group C wokuhlungela iNdebe yoMhlaba ngoLwesihlanu ngo-18h00 eToyota Stadium, eFree State.

UMokoena usematheni njengoba kudlala le midlalo, kwazise ithimba labaqeqeshi beBafana lamdlalisa kungafanele emlenzeni wokuqala neLesotho ngoMarch walo nyaka, kwazise kwakufanele adonse isigwebo somdlalo owodwa ngoba wayenamakhadi amabili aphuzi.

NGUTEBOHO Mokoena oyinjini yeBafana Bafana.

ISITHOMBE NGABE: BACKPAGEPIX

I-LeFA yafaka isikhalo sekudlule isikhathi, okwenza iFifa yangalusukumela lolu daba.
UMohapi uxwayisa iSafa njengoba ethi uma nje ike yamdlalisa uMokoena kulo mdlalo, izobe ihlokoloze iziqandu.

"Uma nje iSouth Africa ike yamdlalisa uTebogo Mokoena, sizofaka isikhalo ngokusemthethweni kwiFifa.

"Into ezokwenza sifake isikhalo, wukuthi njengoba edlala nathi kuzobe kusho ukuthi akazange asidonse isigwebo somdlalo owodwa okwakufanele asidonse sibhekene nabo emlenzeni wokuqala.

"Emdlalweni weBenin kwabe kungewona umdlalo okwakufanele adonse ngawo isigwebo njengoba engadlaliswanga. Kabakwazi ukuzikhethela umdlalo okufanele adonse ngawo isigwebo, yingakho uma bemdlalise kithina sizofaka isikhalo kwiFifa.

"Kulokhu ngeke silenze iphutha, uma nje sike sambona esikimini, uzothi nje umdlalo uqala sizobe sesisifakile isikhalo ngokusemthethweni," kusho uMohapi.