Kuzoqhwiza umentshisi ezimpini zomhlaba eziseGoli

NGU-RICARDO Malajika.

Linda Ximba

UZOZIBEKA ethubeni lesicoco seWorld Boxing Council (WBC) junior bantamweight uRicardo “Magic Man” Malajika uma evikela isicoco se-International Boxing Organization (IBO) kuVince Paras wasePhilippines e-Emperors Palace, eKempton Park, eGoli ngoMgqibelo ebusuku.

Ibhande leWBC liphethwe nguJesse “Bam Bam” Rodriguez wase-USA osanda kunezezela ngeleWBO aliphuce uFernando “Puma” Martinez empini ebiseSaudi Arabia ngeledlule.

URodriguez nguye oqede ubungqwele bukaPhumelela “The Truth” Cafu ngoJuly empini ebise-USA.

UMalajika usethubeni lokulwela isicoco seWBC nje, yingenxa yokuvikela ngempumelelo ese-IBO njengoba esesivikele amahlandla amathathu ngemingqimuzo yomlalisaphansi.

Ugcine ukubonakala eringini engqimuza uJackson “M3” Chauke ngoMarch eKempton Park.

Uzoya kule mpi nerekhodi lokunqoba izimpi eziwu-16, kanti usahlulwe kabili.

UParas yena usenqobe izimpi eziwu-24, wahlulwa kathathu, kanti usalwe i-draw eyodwa.

KUNGESIKHATHI uRodriguez wase-USA (okwesokudla) exhimfana noCafu wakuleli .

UBrian Mitchell oyimenenja kaMalajika, uthe bakholwa wukuthi iWBC izolivumela ibhokisa lakhe ukuthi lilwele lesi sicoco sale nhlangano ehamba phambili emhlabeni jikelele.

UMitchell, owayeyingqwele yeWorld Boxing Association (WBA) ne-International Boxing Federation (IBF) junior lightweight, uthe: “UMalajika usebheke ukulwela isicoco seWBC ngoba kuyacaca ukuthi kwi-IBO akanabo ontanga.

" Amalungiselelo ahambe kahle futhi kangiboni lo mlisa wasePhilippines ezokuma endleleni yethu.”

NGUPHIKELELANI Khumalo ozoba nempi okuzobe kubangwa kuyona amabhande amabili.

Ngawo uMgqibelo, uPhikelelani “Stinger” Khumalo noDonjuan Van Heerden bazoshukana embangweni wesicoco seSA nese-African Boxing Union (ABU) middleweight.

La manxele asenesikhathi efunana eringini, kanti kulindeleke kubonakale izinhlansi kwazise akekho ozofuna ukuhlulwa ngoba lokho kuzochaza ukuthi ahambe wonke amabhande.

UKhumalo waseMthwalume uqeqeshwa nguyise, uMlindelwa Reginald Khumalo, ungaphansi kweNo Doubt Management kaCollin “Nomakanjani” Nathan wodumo lokuwelisa amabhokisa ngelibanzi.

UKhumalo ugcine ukulwa ephuca uJohn Bopape ibhande lakuleli ngamaphuzu, kanti uVan Heerden yena ugcine ukulwa noDean Promnick enqoba isicoco se-ABU.