Udalula iqhaza likaNabi kwiChiefs

NGUMQEQESHI weChiefs, uNasreddine Nabi (okwesokudla) enesekela lakhe, uCedric Kaze.

ISITHOMBE NGABE: BACKPAGEPIX

Senzo Sokhela

UPHUMELA obala ngokwenziwa ngumqeqeshi weKaizer Chiefs, uNasreddine Nabi, yize engekho eNingizimu Afrika uCedric Kaze ongumsizi wakhe, obambe izintambo zokucija le kilabhu ngokubambisana nomunye uzakwabo, uBen Youssef, naye ongumsizi kaNabi.

IChiefs igila izimanga ngale sizini njengoba isinqobe imidlalo emibili yeBetway Premiership ilandelana.
Iqale ngokwehlula iStellenbosch FC ngo-2-0 ngeledlule, yabe isilandela ngePolokwane City eyigaxe u-1-0 wegoli likaSiphesihle Ndlovu ngoLwesithathu ebusuku eFNB Stadium, eSoweto.

IChiefs ithola imiphumela emihle nje, uNabi akabonwa njengoba eseTunisia ukuyohlala nomkakhe okuvela ukuthi uvelelwe yingozi, wawa kabi enza umsebenzi wasekhaya.

NGUSIPHESIHLE Ndlovu ejabulela igoli lakhe lokuqala selokhu esayine kwiChiefs. Leli goli ulishaye ngoLwesithathu iziMpofana ziguqisa iPolokwane City koweligi.

ISITHOMBE NGABE: BACKPAGEPIX

UKaze uthi uNabi unesikhulu isandla ngokwenzeka kwiChiefs, yize engekho njengoba bexhumana naye ngakho konke njengenhloko yabo.
"Sixhumana naye mihla namalanga. Uyasethemba isipiliyoni sethu nolwazi lwethu. Yithina esihlale sisejimini njengoba engekho, sibona yonke into.

"Uyasethemba ngokubophela isikimu, kodwa njengenhloko yabaqeqeshi, konke kufanele kudlule kuyena bese eluleka lapho kufanele eluleke khona.

"Njengamanje kakukhathalekile ukuthi ngubani osebhentshini, into emqoka wukuthi iChiefs iyanqoba, okuyikhona okubalulekile," kusho uKaze.

Le kilabhu izoshukana neRichards Bay FC koweligi ngoLwesibili ngo-19h30 eFNB Stadium. IBay kayikaze inqobe selokhu kuqale isizini, okuyenza ibalwe namakilabhu angakatholi ngisho elokubika iphuzu.

Isiyonke imidlalo ezogijinywa phakathi nesonto elizayo imi kanjena:-
NGOLWESIBILI
EBuffalo City Stadium: Chippa United vs TS Galaxy 19h30.
EChatsworth Stadium: Durban City vs Golden Arrows 19h30.
E-FNB Stadium: Kaizer Chiefs vs Richards Bay 19h30.
E-Olympia Park: Orbit College FC vs Sekhukhune United 19h30.
EDr Petrus Molemela Stadium: Siwelele vs Polokwane City 19h30.
NGOLWESITHATHU
EPrincess Magogo Stadium: AmaZulu FC vs Marumo Gallants 19h30.
ESeshego Stadium: Magesi FC vs Mamelodi Sundowns 19h30.
E-Orlando Stadium: Orlando Pirates vs Stellenbosch FC 19h30.