Phumlani Gama

UZODEDELWA ngenyanga ezayo umbiko oqukethe imininingwane ngengozi yebhanoyi elincane eliphahlazeke eGreytown, emini ngeSonto.

Kule ngozi kuphangalale abafundi ababili abebefundela ukushayela amabhanoyi kwesinye sezikhungo eziqeqesha abafundi ePitoli, eGauteng nomunye obenza izifundo zeMedicine.

Isidumbu sikaNkz Nqobile Biyela (23) waseMlazi, eThekwini - okuvele ukuthi nguyena obeshayela ibhanoyi - esikazakwabo uMnu Lulama Msane (23) waseDundee, nesikaMnu Siphesihle Buthelezi (20) obenza izifundo zeMedicine, zitholakale zidindilizile endaweni yesigameko.

NGULULAMA Msane

Kubikwa ukuthi indiza ebihamba laba bafundi ibe ngeyesibili ukwehlelwa yingozi, emuva kokuba enye abebehambisana nayo, ibe nenkinga ethi mayifane nebihambisa nabo.

UMnu Ndabezinhle Sibiya okhulumela uNgqongqoshe wezokuThutha nokuHlaliswa kwaBantu KwaZulu-Natal, uMnu Siboniso Duma, uthe lo mholi uchaze abafi njengabantu abebekhaliphile njengoba bebenza izifundo zalolu hlobo.

"Ungqongqoshe  ngokubambisana nezinye izinhlaka, bazodedela umbiko onemininingwane ebalulekile ngalolu daba emuva kwezinsuku eziwu-30. Umnyango uyaqhubeka nokuxhumana nemindeni yezisulu," kusho uSibiya.

NGUSIPHESIHLE Buthelezi

Ekhuluma neLANGA Lempelasonto unina kaNqobile, uNkz Thabile Biyela, uthe bewumndeni bafe olwembiza njengoba bebenethemba lokuthi indodakazi yabo isizokwazi ukusebenza, isize kwezinye zezidingo zasekhaya.

"UNqobile waqala ukuba nothando lokushayela amabhanoyi efunda u-grade 7, kwesinye sezikole zaseBloemfontein.

"Lokhu waqala ukukuveza ngosuku lapho yena nozakwabo ekilasini, babecelwe ukuba baphathe izithombe nezingqwembe ezinemibhalo yemisebenzi abafisa ukuyenza uma sebekhulile. Kusukela lapho, uNqobile wayehlala esitshela ukuthi yena usengumshayeli wamabhanoyi.

"Udlule emhlabeni eseneminyaka emibili eqalile ukuqeqeshelwa lo msebenzi," kusho uNkz Biyela.