I-CMA iqinisekisa eyokukhumelana umlotha neKZN Athletics

Bahlanganiswe yi-ASA, nosuku lomjaho ka-100 seluqinisekisiwe

Mzwamandla Zondi

ICOMRADES Marathon Association (CMA) ngomlomo kasihlalo wayo uMark Leathers ithembisa abagijimi ukuthi umjaho wabo ka-2027, okungowekhulu, uzokube ukhona. Ukusho lokhu kulandela umdonsiswano obukhona phakathi kwabo neKwaZulu-Natal Athletics (KZNA).

I-CMA ibithe ifuna ukuphuma ngaphansi kweKZNA, ibhalise ngaphansi kwe-Athletics South Africa (ASA) eyengamele ezokugijima eNingizimu Afrika.
ILANGA Lempelasonto lingakudalula ukuthi isinqumo ebesifuna ukuthathwa yiCMA kasehlanga kahle kwiKZNA njengoba isabise ngokuya enkantolo iphikisana naso. Kuthiwa iCMA ibingakayikhokhi imali ye-levy ekhokhwa ngamakilabhu kwiKZNA uma ehlela imijaho.

NGUSIHLALO weComrades Marathon Association uMark Leathers nephini lake uNontuthuko Mashimane.

Lokhu kuholele ekutheni kube nomhlangano ngoLwesihlanu obuphakathi kwazo zontathu lezi zinhlangano. ULeathers uthe lo mhlangano obungoLwesihlanu olwedlule eLangeni Hotel eThekwini uba yimpumelelo.

"Umhlangano esibe nawo ngoLwesihlanu neKZNA ne-ASA uhambe kahle kakhulu. Ziningi izinto esixoxe ngazo eziya phambili kodwa kukhona okungatheni esingavumelananga ngakho.

"Engingakuqinisekisa wukuthi umjaho wethu wangonyaka ozayo uzokuba khona mhla ka-13 kuJune usukela eMgungundlovu usongwe eThekwini. Lo mjaho uletha izigidi zamarandi esifundazweni, ngakho-ke ngeke singabi nawo.

NGU-JOHN Mathane obambile njengomengameli
we-Athletics South Africa.

"Ngomhla ka-1 kwephezulu sizokuba neSpecial General Meeting (SGM) lapho sizobhunga ngezinhlelo zomjaho wangonyaka ozayo. Okuningi mayelana nezinhlelo zomjaho wethu kuzovela kulo mhlangano," kusho uLeathers.

NeKZNA nayo izokuba nomhlangano wayo (SGM) mhla ka-8 kwezokwethwasa kuyobhungwa ngezinto ezithinta le nhlangano kulandela ukumiswa kukamengameli wayo uSteve Mkasi ngenxa yempi abe nayo nomgijimi ngoMgqibelo eMorningside.