Uza nomacekeceke bezimoto unyaka ka-2026

UZA nomacekeceke wezimoto unyaka ka-2026, njengoba inkampani engaphansi kweChery, ithembisa unyanyavu lweLepas.

Lolu hlobo lwemoto olusemkhakheni wamaSUV amancane, lwaziwa ngeLepas L4, kanti kulindeleke ukuba luqhudelane neKia Sonet, iHyundai Venue neChery Tiggo Cross.

 Uma ubhekisisa, lolu hlobo lwezimoto lungenise kakhulu emigwaqweni yaseMzansi, okwenza kube nesasasa ukulethwa kweLepas kuleli.

YI-HYUNDAI Venue engenye yezimoto ezizobe ziqhudelana neLepas L4 emigwaqweni yakuleli kulo nyaka.

Nakuba ingakethulwa ngokusemthethweni kuleli, uma sibheka izimakethe namazwibela abasithumelela wona, kubukeka buzothatha abaningi ubunyoninco besakhiwo esifana namalambu ayo eLED, akhanyisa ngokwehlukile emini.

Kulabo ababazisayo olayini abakhombisa ukwakheka kwezinga (design) lemoto, ikhala nengaphambili layo elithathele ezimotweni zabadla izambane likapondo.

Abakhi nonjiniyela beLepas, bathembisa ubuchwepheshe obuphambili obuzokwenza kube lula ukushayela, wena owabona irobhothi, kanti izazi zithi abashayeli bangalindela kusukela ku-13.2-inch walapho imoto ikuvezela khona konke ongakwenza ngayo (central control and display).

YINGXENYE yengaphakathi leLepas L4.

Esitatimendeni esikhishwe ngabakwaLepas, bathi ngalolu hlobo lwemoto, banyusa izinga lezimoto eselijwayelekile, lemixhantela nobuxhakaxhaka bobuchwepheshe.

Baqhuba ngokuthi lolu hlobo lwemoto ngolwabashayeli abazisa ikusasa, abanolwazi olunzulu lokusebenzisa ubuchwepheshe, nababona imoto abayishayelayo njengendlela yokubukwa.

"I-L4 ithatha ukushayela imoto esezingeni eliphezulu, ikuyise kwimfashini. Siyifanise nengwe ekuyakheni nokubukeka kwayo, kanti nakuba iwuhlobo lwe-SUV encanyana, isiqu sayo sikhulu. Ngaphakathi izinzile, yase iba nezinhlaka ezithile zesimanjemanje," kusho isitatimende esikhishwe ngabakwaLepas.

Kulindeleke ukuba amandla ayo emgwaqweni athathele kwawakwaChery, esukela enjinini ewu-1.5 litre turbo kaphethiloli, aqhulula u-108kW no-210Nm.

Kulo nyaka sibheke izimoto ezintsha eziningi ezizokwethulwa kuleli, ngenxa yokuthatheka kwabashayeli ohlotsheni lwezimoto ezinobuchwepheshe obuthe thuthu, ezingawudli uphethiloli, futhi ezihambisana nezidingo zabathengi bezimoto baseMzansi. 

ILANGA Lempelasonto lizoba ngabokuqala ukushayela le moto, ukunika abafundi ulwazi ngayo, nokubheka ukuthi lezi zethembiso ziliqiniso na.