Usaqine idolo umqeqeshi weLeopards ukujika izinto

Mfanafuthi Ndlovu

USELAKHILE itulo lokucoboshisa izitha umqeqeshi weBlack Leopards ezoshukana neKruger United koweMotsepe Foundation Championship (MFC) ngoMgqibelo ngo-15h30 eThohoyandou Stadium, eVenda.

ILANGA Lempelasonto lithole ukuthi yize ebhekene nobunzima bokuthola amaphuzu agcwele uJoel Masutha opheka le kilabhu, usaqine idolo ukuthi usazokwazi ukuphendula amatafula.

Uthi yize izinto zisambhimbela, kodwa unalo iqhinga azolisebenzisa ukugudluza iKruger endleleni yabo njengoba bezokube besekhaya.

NGUMQEQESHI weKruger United, uVusumuzi Vilakazi.

ISITHOMBE NGABE: BACKPAGEPIX

Lo mqeqeshi uthi yize ewulungiselele kahle lo mdlalo, kodwa uyazi ukuthi uzokube ebhekene nomqeqeshi okhaliphile, uVusumuzi "Kanu" Vilakazi opheka iKruger.

Nokho uthi kuyoshiyana ukwenza njengoba ewabona wonke amaphuzu esala kubona eVenda.

Kubadlali ababhekiwe ukutholela iLeopards amaphuzu agcwele kukhona uThendo Mukumela noBethuel Muzeu ongumgadli obevutha bhe nangesizini edlule, kanti iKruger igabe ngoKhethukuthula Ndlovu, uMlungisi Sikhakhane obekwiRoyal AM noCelimpilo Ngema osuka kumaZulu FC ukukha nje phezulu.

* IMilford FC izobhekana nomqansa kwi-Upington City koweMFC ngoMgqibelo ekuhambeni.

IMilford yiyona eziholayo esicongweni salesi sigaba esiyisango lokungena kwiBetway Premiership.

Isiyonke imidlalo yeMFC engempelasonto imi kanje:-
NGOLWESIHLANU
EDobsonville Stadium: Leicesterford City vs Highbury FC 15h30.
NGOMGQIBELO
KaNyamazane: The Bees vs Venda FC 15h30.
EMxolisi Dicksy: Upington City vs Milford FC 15h30.
EHarry Gwala: Midlands Wanderers vs Cape Town City 15h30.
EGlobal: Baroka FC vs University of Pretoria 15h30.
EThohoyandou: Black Leopards vs Kruger United 15h30.
NGESONTO
E-TUT: Gomora United vs Lerumo Lions 15h30.
ESolomon Mahlangu: Casric Stars vs Hungry Lions 15h30.